Nga Ardit Rada
Renditja në krye të grupit për “Euro204” teksa i kanë mbetur edhe tre ndeshje e kanë bërë Kombëtaren shqiptare të futbollit të ngjallë interesin e sportdashësve. Nëse deri dje publikun e lusnin të ndiqte një ndeshje futbolli, apo në të shumtën e rasteve përfaqësuesja edhe bojkotohej, fitorja në shtëpi ndaj Polonisë bëri që shpresat për një kualifikim në ‘Euro 2024’ të shtohen.
Pikërisht këtë entuziazëm e kanë shfrytëzuar në mënyrën më të shëmtuar një grup batakçinjsh që brenda 2 orësh nga njoftimi i FSHF se nisi shitja për biletat e ndeshjes me Republikën Çeke, i kanë blerë të gjitha ato. Përjashto kuotat për Tifozët Kuqezinj dhe ndonjë ftesë që FSHF bën apo shpërndan falas, bëhet fjalë për rreth 20 mijë bileta të tjera që sa zbardhi mëngjesi i së shtunës kanë dalë në treg të zi me minimalisht trefishin e çmimit. Ky çmim pritet të rritet sa më shumë që afron 12 tetori i ndeshjes Shqipëri – Republika Çeke në “Air Albania”.
Në këtë situatë të pritshme dyshimet, por edhe përgjegjësia bie mbi Federatën Shqiptare të Futbollit. Dyshimi kryesor lidhet me faktin që vetëm FSHF e dinte orën se kur do të shpallej shitja e biletave dhe veç ajo ka akses në faqen e tregtisë online. A mos vallë vetë punonjësit brenda Federatës kanë nxituar të bëjnë biznes në tregun e zi? Gjithashtu, një numri të madh tifozësh që kanë arritur të blejnë mbrëmë bileta me çmimin e zyrtar, sot u ka ardhur e-mail nga sistemi i federatës se blerja iu është anuluar dhe lekët iu janë kthyer mbrapsht, pa asnjë shpjegim shtesë.
Së dyti, përgjegjësia e FSHF është që të garantonte mekanizmin që kjo të mos ndodhte. Fenomeni u pa edhe në ndeshjen me Poloninë, ku qindra bileta u shitën minutat e fundit me çmime marramendëse. Ndaj paralajmërimi nuk ka munguar.
Nuk është e ndershme që të thuash se FSHF bëri transparencë dhe kush mundi, i mori. Të gjithë jemi dëshmitarë këtë të shtunë sesi në grupet në Telegram e Whatsapp po shitet minimum 300 euro një biletë.
Ndaj duhet menduar, mos vallë biletat duhen shitur fjala bie përmes e-Albania, apo sporteleve fizike? Mos ndoshta FSHF duhet të shohë sistemin dhe ta padisë në Prokurori atë që ka blerë 100 bileta dhe ka vetëm një bythë për të ulur ne stol? Për aq kohë sa tregu i zi është i dënueshëm, përgjegjësia e organizatorëve është e pashmangshme.
Dhe nëse kjo situatë nuk ka një qendrim zyrtar nga Federata, e humbura më e madhe do të dalë ajo vetë me një stadium gjysmë-bosh apo ku gjysma e tifozëve janë turinjvarur për çmimin e kripur që kanë paguar.
Sepse nëse heshtet sikur s’ka ndodhur asgjë, Kombëtarja sërish do të fitojë, por Federata do të mbetet me turp!
Ilustrime sesi po shiten biletat e ndeshjes me Republikën Çeke:
