Kanë kaluar gati dy muaj që kur Avokati i Popullit, Hilmi Jashari, i është drejtuar me një opinion Komitetit të Ministrave të Këshillit të Evropës për mosekzekutimin e aktgjykimit të Gjykatës Evropiane të të Drejtave të Njeriut (GJEDNj) për rastin Grudiç, kundër Serbisë.
Jashari pret që përgjigjja t’i vijë javën e ardhshme. Komiteti i Ministrave, sipas tij, duhet të marrë parasysh opinionin e tij dhe Fondi të kthehet në Kosovë, shkruan “Koha Ditore”.
Në vendimin e Strasburgut të datës 17 prill 2012, u është dhënë e drejta për kthim të pensioneve të ndërprera në vitin 1999 dy pensionistëve nga Mitrovica me mbiemër Grudiq, të cilët për t’u ankuar në Strasburg ishin shpërngulur në Novi-Pazar, pasi që kjo gjykatë nuk i shqyrton ankesat e banorëve të shteteve që nuk janë anëtare të Këshillit të Evropës.
