Kryetari i Partisë Demokratike, Sali Berisha, në një fjalim para grupit parlamentar demokrat, kritikoi ashpër procesin e emërimit të Avokatit të Popullit.
Sipas Berishës, kryeministri ka mbajtur peng procesin për dy vjet dhe më pas, në mënyrën më të vendosur, ka emëruar kandidatin e tij, duke shkelur procedurat kushtetuese dhe ligjore. Ai theksoi se emërimi u bë pasi firmat e mbështetësve u tërhoqën një nga një, dhe se kryeministri zgjodhi pikërisht kandidatin që i shërbente interesave të tij.
“Zero tolerancën e tij ndaj balancës dhe kontrollit të pushteteve. Edi Rama faktoi dhe provoi se ai është i aftë të përmbysë gjithçka, qoftë dhe për një % minimale pushteti që duhej të ndante siç është rasti i Avokatit të Popullit. Jo për interes të opozitës, por të funksionimit të këtij institucioni në atë frymë të besueshmërisë së atij institucioni para qytetarëve shqiptare.
Prej 2 vitesh mban peng këtë proces dhe në fund në mënyrën më të vendosur grabiti dhe emëroi njeriun e tij.
Emëroi një kryetar partie që ditën paraqitej si opozitë dhe natën flirtonte me të.
Por emëroi duke shkelur çdo procedurë kushtetuese dhe ligjore, emëroi pasi të gjitha firmat e dhëna për të, jo për tu zgjedhur, por të listohej në listën e kandidatëve që do shqyrtonte komisioni i ligjeve.
Firma që u tërhoqën një nga një nga firmëtarët që kishin firmosur”, tha Berisha. Ai shtoi se kjo zgjedhje shkel praktikat e mëparshme dhe disa detyrime që rrjedhin nga procesi i integrimit të Shqipërisë, megjithëse kriteret dhe standardet europiane i përcakton vetë kryeministri.
Berisha përmendi gjithashtu se emërimi u bë në një kohë kur klima politike për këtë parti gjatë garës elektorale në Tiranë ishte e tensionuar, dhe pavarësisht se u kërkua ndjesë publike për gabimet, ato nuk i fshehin shkeljet procedurale.
