Avokati grek i Klement Balilit, që njihet ndryshe edhe si “Eskobari i Ballkanit”, në një reagim të tijin pas dorëzimit të dosjes nga autoritetet greke tek Ministria shqiptare e Drejtësisë e më pas në Prokurori, tregon rastet kur autoritetet shqiptare mund të arrestojnë klientin e tij. Sipas avokatit Aleksios Kugias, ndonëse është dorëzuar një dosje voluminoze për Balilin, brenda saj nuk ka asnjë provë.
“Çështja është ende nën hetim edhe në Greqi, megjithëse ka disa të arrestuar dhe po mbahen në burg”,- thotë ai për Tv Klan.
Avokati me seli në Athinë thotë gjithashtu se vetëm dorëzimi i dosjes te autoritetet shqiptare nuk justifikon arrestimin e Balilit, pasi së pari dokumentacioni duhet studiuar nëse është i mbështetur në prova. Sa u përket provave avokati i ish – kreut të Transporteve të Sarandës thotë se asnjë prej të arrestuarve nga policia greke nuk ka përmendur emrin e Klemend Balilit.
“Studimi i dosjes së çështjes tregon se të gjithë të pandehurit e arrestuar në Greqi janë të huaj për Balilin, askush nuk e njeh atë dhe askush nuk pretendon se ai ka kryer ndonjë krim” – thotë avokati.
Sipas avokatit mbrojtës, e gjithë çështja ka prapavijë politike për shkak të zgjedhjeve të ardhshme në Shqipëri, duke implikuar në këtë skenar edhe disa oficerë të policisë greke të lidhur me politikanë grekë. Dosja në ngarkim të Klement Balilit mbërriti në Tiranë në 14 Nëntor më një korrier diplomatik dhe pas përkthimit nga greqishtja iu dorëzua Prokurorisë.
ma.me
