Një tjetër avion që dyshohet se do të transportonte drogë jashtë vendit është pikasur një ditë më parë në Vlorë. Kryetari i PD-së në Vlorë, Moisi Meminaj, ka publikuar disa foto të avionit që fluturon mbi Vlorë, të cilat ia kanë dërguar banorët e qytetit.
Policia e shtetit bëri të ditur se në orët e para të mëngjesit të djeshëm, kishte marrë informacion në rrugë operative se në zonën e fushave të fshatit Akërni, po lëvizte në hapësirën ajrore, një avion i vogël. Menjëherë pas marrjes së këtij informacioni u organizuan të gjitha shërbimet e Drejtorisë Vendore të Policisë Vlorë, Drejtorisë Rajonale të Kufirit dhe Migracionit Vlorë si dhe të Njësisë së Lëvizshme Territoriale Delta Force.
Gjithashtu, është njoftuar menjëherë edhe Drejtoria për Hetimin e Narkotikëve dhe Trafiqeve në Drejtorinë e Policisë së Shtetit. Po të njëjtat burime deklaruan se në lidhje me avionin është njoftuar dhe policia italiane, me qëllim ndjekjen e përbashkët të këtij informacioni. Në bashkëpunim me homologët italianë, u punua intensivisht për verifikimin e këtij informacioni, duke zhvilluar veprime të koordinuara në Vlorë dhe në një pjesë të territorit të vendit fqinj.
Në lidhje me këtë ngjarje, blutë e qytetit bregdetar kanë shoqëruar edhe tre persona, të cilët dyshohet të jenë pjesëtarë të një grupi të njohur në zonën e Vlorës që merret me trafik ndërkombëtar të lëndëve narkotike.
AVIONI
Me gjithë masat e marra nga policia, vijon trafikimi i drogës me avionë. Shtatë muaj pas sekuestrimit në Itali të një sasie prej 120 kg marijuanë të transportuar nga Vlora me avion, dje është shënuar një tjetër tentativë e trafikimit të lëndës narkotike. Burimet e mësipërme pohuan se kanë qenë banorët e Akërnisë ata që kanë sinjalizuar policinë se një avion i vogël po lëvizte mbi fushat e fshatit të tyre. Ata janë shprehur se gjatë gjithë javës, një avion i vogël ka fluturuar në zonën e tyre. Pavarësisht ndërhyrjes së shpejtë, nuk është bërë i mundur bllokimi i avionit.
Pas kryerjes së veprimeve hetimore paraprake, policia ka shoqëruar shtetasit me iniciale: N.M., A.M. dhe K.M., si të dyshuar në lidhje me këtë veprimtari. Ndërsa janë sekuestruar dhe dy automjete; një fuoristradë dhe një furgon në pronësi të këtyre shtetasve. Sipas të dhënave paraprake, tre personat e shoqëruar, dyshohet se kanë lidhje me ngarkesën e lëndës narkotike që mund të jetë transportuar me avion të vogël për në drejtim të zonës së Barit të Italisë. Mësohet se blutë po hetojnë për lidhjet e tre shtetasve në fjalë me persona të tjerë të implikuar në trafikun e drogës brenda dhe jashtë Shqipërisë. Për këtë po verifikohen thirrjet telefonike. Paraprakisht dyshohet se ngarkesa mund të jetë siguruar në zonën e lumit të Vlorës dhe më pas është transportuar me mjete në drejtim të fshati Akërni, ku aty mund t’i ketë pritur avioni.
Ende nuk dihet nëse avioni e ka marrë ngarkesën e drogës, apo trafikantët e kanë fshehur atë. Mendohet se avioni mund të jetë ulur në ndonjë zonë tjetër të Shqipërisë për të humbur gjurmët, por ekziston edhe mundësia e uljes së avionit në ndonjë zonë të Italisë pas zhdukjes nga radarët. Zona e Akërnisë tashmë njihet si zonë ku avionë të vegjël mund të ulen lehtësisht për të kryer trafiqe të paligjshme, kryesisht atë të trafikut të lëndëve narkotike. Aktualisht policia shqiptare po bashkëpunon me policinë italiane për zbardhjen e kësaj ngjarjeje.
BW
