Një avion Airbus A320 i linjës Afriqiyah Airways, me 118 njerëz në bord, është ulur në Maltë, pasi është marrë peng.
Pas uljes në pistë, në 12:13, avioni i kishte ende të ndezur motorët, ndërkohë që u rrethua nga ushtarët.
Kryeministri i Maltës, Joseph Muscat, shkroi në Twitter se bëhet fjalë për një pengmarrje potenciale dhe se forcat e siigurisë e të emergjencës janë në vendngjarje.
Sipas raporteve nga Times of Malta, aeroplani fluturonte në linjën e brndshme nga Sebha në Tripoli. Avioni ka shtatë anëtarë ekuipazhi, 111 të tjerët janë pasagjerë.
Zëra të pakonfirmuar flasin për dy pengmarrës, me granata dore.
Pengmarrësit, përkrahës të ish-diktatorit të vrarë Kadafi, thonë se janë gati të lirojnë të gjithë pasagjerët e të mbajnë vetëm ekuipazhin, nëse u plotësohen kërkesat, të cilat ende nuk dihet se cilat janë.
Ky është rasti i parë i një avioni të rrëmbyer që ulet në Maltë që nga 23 nëntori 1985, kur një Boeing 737 i EgyptAir u devijuar drejt ishullit.
Atëherë gjithçka përfundoi tragjikisht, me 62 të vdekur, kur komandot egjiptiane mësynë avionin.
Times of Malta/d.i.
