Mitri Prifti i dyshuar për atentatin ndaj Edison Begajt në Kaninë është arratisur drejt Italisë.
Policia shqiptare e ka shpallur në kërkim ndërkombëtar duke qenë se në sistem rezulton se është larguar drejt shtetit fqinj. 36-vjeçari nga Tirana, është larguar në mënyrë të rregullt një ditë pas ngjarjes, kur policia ende nuk e kishte të vërtetuar me prova implikimin e tij në atentat.
Autoritetet shqiptare janë duke bashkëpunuar me homologët për arrestimin e tij, pasi gjykata ka caktuar arrest në burg në mungesë për veprat penale, vrasje me paramendim e mbetur në tentativë dhe armëmbajtje pa leje.
Dyshimet për përfshirjen e tij në atentat u ngritën menjëherë pas ngjarjes dhe një patrullë e policisë u nis për ndjekjen e tij. Aksioni u organizua pas mbikëqyrjes së kamerave pranë vendit të ngjarjes. Në periferi të Lushnjes, për shkak të shpejtësisë mjeti doli nga rruga duke përfunduar në kanal.
Prifti duke përfituar nga errësira mundi të largohej. Brenda makinës, policia gjeti prova të mjaftueshme për të çuar në identifikimin e autorit të plagosjes së Begajt. Një kapele e përdorur nga autori, fije floku, mbetje biologjike si dhe shenjat e gishtave, zbuluan se bëhej fjalë për 36-vjeçarin nga Tirana, Mitri Prifti.
Si shkak për konfliktin, policia ka si pistë një sherr të ndodhur disa ditë para atentatit të 30 Majit, por nuk përjashtohen dhe mundësi të tjera. Begaj u qëllua me 4 plumba teksa ishte duke u futur me makinë në oborrin e banesës. Ngjarje ndodhi në sy të fëmijëve, të cilët ishin të ulur në sedijen e makinës./ tvklan
g.kosovari
