Më 1 Korrik 2018 Austria merr presidencën e BE-së dhe me këtë për herë të parë e ka kryesinë një koalicion populist i djathtë në Bashkimin Europian.
Puna prioritare do të jetë menaxhimi i çështjes migratore, që ishte objekt i një marrëveshje të brishtë në samitin e zhvilluar në Bruksel.
Ndërkaq moto e Austrisë për presidencën e saj të tretë të BE-së është “Një Evropë që mbron”, duke iu bashkuar shqetësimeve të shumicës së vendeve anëtare.
Në daljen e tij për mediat kancelari austriak, Sebastian Kurz ka thënë se qeveria e tij do të përdorë presidencën e BE-së për ta bërë bllokun më të sigurt, duke shtuar se vendi i tij kërkon të jetë një ndërtues urash në BE dhe të reduktojnë tensionet brenda Evropës.
Ndërkaq, Austria, për shkak të pozicionit qendror në Evropë dhe historisë së saj, mbështet një integrim më të lartë në BE të fqinjëve të saj të Ballkanit Perëndimor dhe e paraqet si një prej prioriteteve të presidencës së saj të BE-së.
Dy fronte, pak kohë: Buxheti i BE dhe Brexit
Një temë tjetër ku Austria kërkohet si ndërmjetësuese është edhe negociimi i buxhetit europian shtatëvjeçar. Buxheti financiar 2021-2027 është i pari që bëhet pa Britaninë e Madhe. Për të kompensuar largimin e Britanisë së Madhe do të duhet të rriten kuotat e paguesve neto në BE. Kancelari Kurz i refuzon këto kuota si „të papranueshme” dhe kërkoi „negociata të gjata dhe të vështira”. Politologu Janis Emmanouilidis shprehet se disa shtete europiane, si Gjermania kërkojnë kompromis të shpejtë, para zgjedhjeve europiane vitin e ardhshëm.
Gjatë presidencës austriake zhvillohet edhe faza e fundit e negociatave për Brexit që duhet të mbyllen këtë vit, me qëllim që Britania e Madhe të largohet në fillim të vitit 2019 me një marrëveshje me BE. Nuk dihet, nëse kjo do të arrihet. Disa pika të rëndësishme, si kontrollet kufitare mes Irlandës së Veriut dhe Republikës së Irlandës nuk janë zgjidhur ende. Po ashtu nuk dihet nëse Britania e Madhe do të mbesë pjesë e tregut të brendshëm europian. Presidenca austriake duhet të ndërmjetësojë, që mes vendeve të BE të arrihet një kompromis, me qëllim të përmbylljes së shpejtë të bisedimeve.
a.ç
