Kryetari i Komisionit të Ligjeve Ulsi Manja ka reaguar sot për mediat lidhur me akuzat e Partisë Demokratike për shantazhin sipas saj që është ushtruar ndaj gjyqtarit shqiptar në Strasburg Ledi Bianku për çështjen e pronave.
Ai e cilësoi materialin e publikuar si një montazh të Partisë Demokratike, duke thënë se Binaku në atë kohë nuk ka pasur asgjë në dorë, se si të ndikonte në Strasburg.
Manja deklaroi u Basha dhe opozita po publikojnë përgjime të cilat më parë janë montuar dhe po i përdorin sipas interesave të tyre.
“Opozita e sotme, dje në pushtet, e di shumë mirë çështjen e pronave dhe detyrimet e qeverisë shqiptare, sipas vendimit-pilot të Gjykatës së Strasburgut. Basha po zhytet thellë e më thellë në ujin e ndenjur ku e ka futur opozitën shqiptare. Na ka zënë taksirati që kur Basha ka marrë detyrën e specialistit të audio-përgjimeve”, deklaroi deputeti socialist.
Ai shtoi se kjo ishte më qesharake se ajo e Babales.
“Ishte “Babalja 2” e PD. Kjo e djeshmja është prova më e sigurt se kur mendon që opozita preku fundin s’ke parë gjë akoma. Dy miq flasin në kafe në 2014 dhe na del një audiopërgjim me fjali të shkëputura ku i bëka fjalë për shantazh ndaj gjykatësit në Strasburg”, deklaroi Ulsi Manja.
