Federata e Atletikës e Kosovës është pranuar me të drejta të plota në Federatën Botërore të Atletikës, në kongresin e 50-të të kësaj Federate që është mbajtur në Pekin, Kinë. “Ky është një lajm jashtëzakonisht i rëndësishëm për atletikën e Kosovës dhe sportin në përgjithësi”, theksohet në urimin e ministrit kosovar të Kulturës, Rinisë dhe Sportit, Kujtim Shala.
Ai po ashtu përgëzon drejtuesit e federatës dhe atletët e Kosovës, duke i uruar suksese në avancimin e mëtejshme të këtij sporti në arenën ndërkombëtare.
“Sporti i Kosovës gjithnjë e më shumë po ndërkombëtarizohet. Ky është edhe një hap i rëndësishëm që ndihmon dhe përshpejton ndërkombëtarizimin, si dhe njohjen e sportit kosovar në arenën ndërkombëtare”, ka theksuar ministri Shala dhe ka shtuar se, “Ministria do të mbështesë në vazhdimësi sportin e Kosovës, sidomos në ngritjen cilësore të tij dhe në afirmimin e tij në rrafshin ndërkombëtar”.
