Demokratët në Dhomën e Përfaqësuesve publikuan këtë të mërkurë, 3 dhjetor, një seri fotosh dhe videosh nga ishulli privat në Karaibe i Jeffrey Epstein, duke ofruar një vështrim të rrallë në vendin e fshehtë ku ai akuzohet se ka trafikuar vajza të mitura.
Materialet e reja tregojnë ambientet e rezidencës së Epsteinit, përfshirë dhoma gjumi, një telefon, një hapësirë që ngjan me zyrë ose bibliotekë, si edhe një tabelë ku janë shkruar fjalët “fin”, “intellectual”, “deception” dhe “power”.
Një nga fotot shfaq një dhomë me një karrige dentisti dhe maska të varura në mur. The Neë York Times ka raportuar se e dashura e fundit e Epsteinit ishte dentiste dhe ndante një zyrë me një nga kompanitë e tij fiktive. Videot duken si një xhirim i brendshëm i pronës. Materialet e publikuara të mërkurën vijnë nga autoritetet ligjzbatuese të Ishujve Virxhin të SHBA-së dhe janë realizuar në vitin 2020, një vit pas vetëvrasjes së Epsteinit në burg.
Epsteini ishte pronar i dy ishujve në Ishujt Virxhin të SHBA-së, përfshirë Little St. James, të cilin, sipas The Neë York Times, disa banorë lokalë e quanin “ishulli i pedofilit”. Në vitin 2022, Prokuroria e Përgjithshme e Ishujve Virxhin arriti një marrëveshje prej mbi 100 milionë dollarësh me pasurinë e Epsteinit, pasi pretendoi se “dhjetëra gra dhe fëmijë u trafikuar, u përdhunuan, u sulmuan seksualisht dhe u mbajtën peng” në ishullin e tij privat.
Edhe pse fotot dhe videot e publikuara së fundmi nuk zbulojnë informacion të ri, ato duket se synojnë rritjen e presionit ndaj administratës Trump përpara afatit të 19 dhjetorit, kur Departamenti i Drejtësisë pritet të publikojë dokumente të tjera të çështjes. Një grup dypartiak ligjvënësish kërkoi gjithashtu nga Prokurorja e Përgjithshme, Pam Bondi, një përditësim mbi ecurinë e hetimit.
“Imazhet e reja paraqesin një pamje shqetësuese të botës së Jeffrey Epstein dhe ishullit të tij. Ne po i bëjmë publike këto foto dhe video për të garantuar transparencë dhe për të ndihmuar në plotësimin e tablosë së plotë të krimeve të tij të tmerrshme. Nuk do të ndalemi deri sa të sigurojmë drejtësi për të mbijetuarat”, thuhet në deklaratën e Robert Garcia, anëtar i komisionit të mbikëqyrjes në Dhomën e Përfaqësuesve.
