Atentati i trefishtë që ndodhi në fundjavë në mbikalimin e Fushë-Krujës vijon të mbetet pa autor dhe plot mister. Në këtë atentat u vranë Brilant Martinaj, Dikler Vata dhe Besmir Hoxha. Së fundmi mediat kanë zbuluar se grupi i vrasësve para se të kryente atentatin ka qëndruar në gadishmëri, rreth 50 minuta, në një xhep të rrugës pranë mbikalimit të Fushë-Krujës.
Nga pamjet filmike është zbuluar se Martinaj dhe Vata pak para se të ndodhte atentati me makinën e tyre kanë mbëritur te një restorant në fshatin Arrameras. Në parkimin e restorantit ata kanë lënë makinën e tyre dhe më pas kanë ikur drejt fshatit Larushkë me një mjet me targa Gjermane, të vjedhura një furgoni në Pogradec. Shoferi që ka çuar dy të rinjtë te servisi në Larushkë nuk ka dalë për asnjë moment nga makina dhe ende nuk është identitikuar.
Ka dyshime se ky person mund të ketë qenë informatori i vrasësve pasi mund t’iu ketë treguar atyre çdo lëvizje. Vata dhe Martinaj kanë shkuar te servisi në Larushkë për të marrë makinën e Martinajt por duke ditur se ajo ende nuk ishte gati ata janë kthyer sërish te restoranti në Arrameras me mjetin me targa gjermane.
Në restorant janë takuar me Besmir Hoxha dhe më pas të tre janë nisur drejt Laçit. Të gjitha këto lëvizje të tyre, dyshohet se janë vëzhguar nga autorët. Sapo makina e viktimave ka kaluar para syve të autorëve që qëndronin në gadishmëri, ata i janë vënë nga pas. Në mbikalimin e Fushë-Krujës, makina e autorëve ka parakaluar atë të viktimave, duke i dalë para dhe qëndruar në mes të rrugës. Në këtë moment nga makina e autorëve kanë zbritur 3 persona, duke hapur zjarr e duke i vrarë 3 t? rinjtë në vend.
Autorët dyshohet se janë larguar në drejtim të Laçit, duke djegur makinën. Më pas dyshohet se ata janë larguar me një makinë tjetër në drejtim të Kosovës.
