44-vjeçari Denis Kasa që mbeti i vdekur në atentatin e ndodhur mbrëmjen e të premtes në hyrje të qytetit të Fierit mendohet se nuk ka qenë shenjestër e atentatit. Ai rezulton se ishte emigrant në Itali dhe kishte pak ditë që ishte kthyer në Shqipëri për të kaluar me familjen festat e fundvitit.
Kasaj, ndryshe nga dy personat e mbetur të plagosur që po udhëtonin bashkë me të në momentin e atentatit, nuk rezulton të ketë precedent kriminal në të kaluarën.
Kjo ka bërë që policia të nisë verifikimet nëse shënjestër e atentatit me kallashnikov mund të kenë qenë të dy të plagosurit.
“Panorama” shkruan se 42-vjeçari që mbeti i plagosuri Elton Margariti është kthyer nga Holanda para dy ditësh, ku dyshohet se ka pasur konflikte që lidhen me trafikun e lëndëve narkotike. Mendohet se ky ka qenë shënjestër e atentatit.
Kasaj ishte shok me Elton Margariti, 42 vjeç nga Patos dhe Klement Kastrati, 31 vjeç nga Fieri të cilët ndodheshin në makinë me të në momentin e atentatit.
Në vendngjarje janë gjetur dy armë kallashnikov, njëra në makinën ku udhëtonte viktima, ndërsa arma tjetër u gjet pak metra larg makinës.
Kasaj ndodhej si pasagjer në automjetin tip “Benz”, ndërsa një prej të plagosurve ishte shofer kurse tjetri ishte ulur në sediljen e pasme.
Autorët pasi kanë qëlluar me armë, janë larguar me një automjet tip “Toyota” me targa të huaja, të cilën e kanë djegur në mes të një are rreth 1 kilometër nga vendngjarja.
