Pas atentatit të ndodhur në Durrës këtë mbrëmje, policia njofton se njëri prej dy të plagosurve, shtetasi Asllan Kërtusha, ka humbur jetën në Spitalin e Durrësit. Kërtusha njihej si një shok i Denis Shtrazës, personi i cili javë më parë u arrestua për rrëmbimin dhe vrasjen e Gazmend Çollakut në muajin janar.
Plagosja e dy të rinjve ndodhi në lagjen 17 në Durrës dhe mësohet se shkaku i të shtënave ka ardhur pas një sherri në një lokal.
Por e dhëna se Kërtusha është mik i Shtrazës, bën që hetimi të marrë një dinamikë tjetër.
POLICIA: PLAGOSJA PAS SHERRIT NE LOKAL
Policia e Durrësit ka dhënë detaje në lidhje me plagosjen e dy persona. Sipas Policisë, ngjarja ka ndodhur rreth orës 18:55, në Lagjen Nr. 17 të qytetit. Dyshohet se plagosja ka ardhur pas një sherri në lokal.
“Më datë 01.03.2016, rreth orës 18:55 në lagjen Nr.17, Durrës pranë Ndërmarrjes së Ujësjellësit, pas një konflikti për motive të dobëta janë plagosur me armë zjarri dy shtetas. Shtetasi B.K.34 vjeç, jashtë rrezikut për jetën dhe një shtetas tjetër, i paidentifikuar, i cili ndodhet ne Sallën e Operacionit ne gjendje serioze për jetën në Spitalin e Durrësit”, citohet në deklaratën e bluve të qytetit bregdetar.
Kush është Denis Shtraza
33-vjeçari me banim në Durrës është një emër jo i panjohur për Policinë e Shtetit. Burime zyrtare nga Policia e Durrësit kanë bërë me dije se Denis Shtraza është i dyshuar si autor i rrëmbimit dhe vrasjes së Çollakut për motive ende të panjohura. Për policinë, ai është një person me tendenca të theksuara kriminale, si dhe me precedentë penale në fushën e veprave penale kundër jetës dhe i dyshuar si anëtar i një grupi kriminal që operon në zonën e Durrësit dhe të Tiranës.
Ai u plagos në një atentat të ndodhur më 5 Shkurt të vitit 2013, pranë Fabrikës së Cigareve në Durrës. Bashkë me të gjendej edhe Elvis Tafaruçi, i cili u vra në muajin maj të vitit 2013 pranë Shkëmbit të Kavajës.
Në vitin 2009, Shtraza qe ekstraduar nga Gjermania si autor i dyshuar i dy plagosjeve të rënda, nga gjykimi i të cilave u shpall fajtor, por doli me dënime të lehta që konsistonin në gjobë dhe 4 muaj burg.
Ndaj 33-vjeçarit rëndojnë akuzat “Rrëmbimi ose mbajtja peng e personit” dhe “Vrasje e kryer në bashkëpunim”
Pse Denis Shtraza akuzohet për vrasjen e Gamend Çollakut
Denis Shtraza, 33-vjeçari i arrestuar mbrëmjen e së enjtes në Rinas teksa tentonte të linte vendin, njihet si mik i Ervin Kodrës, të riut që mbeti i vrarë në një atentat të 20 dhjetorit 2015 në Durrës. Shtraza u arrestua si i dyshuar kryesor për rrëmbimin në Durrës e më tej vrasjen e Gazmend Collakut, ngjarje e ndodhur në 6 janar të këtij viti shkruan Shqiptarja.com
Duke u nisur nga ky fakt 33-vjeçari mund ta ketë vrarë Çollakun në formë hakmarrjeje për mikun e tij. Kjo pasi 34-vjeçari Collaku, i cili u gjet i masakruar anë një rruge ne Fushë-Krujë një ditë pas rrëmbimit, ishte një nga personat e shoqëruar për disa orë në Policinë e Durrësit ditën kur ndodhi vrasja e Ervin Kodrës dhe mikut të tij Endri Çaushaj.
