Gjykata e Shkodrës la dje në burg shtetasin Shkëlzen Xhenja, i dyshuar si autor për plagosjen e Flutura Muçës, më 18 shkurt, në lagjen “Rus” të këtij qyteti.
I riu i dyshuar edhe si vrasës me pagesë mësohet se kishte pak kohë që kishte dalë nga burgu.
Shkëlzen Xhenja është liruar nga burgu me 17 janar të këtij viti, duke përfituar nga amnistia pas një dënimi prej 4 vitesh e 8 muaj që ka pasur për vendosje tritoli në vitin 2014 në banesën e biznesmenit Bledar Canka. Xhenja dyshohet se plagosi me armë zjarri shtetasen Flutura Muçën, ndërsa motivi i kësaj ngjarjeje mbetet ende mister. 49-vjeçarja ishte shitëse në një dyqan në lagjen ku ndodhi ngjarja, ku një motor me dy persona me skafandra në kokë është afruar, duke qëlluar ndaj saj me armë zjarri, për pasojë e dëmtuara pësoi tre plumba, por fatmirësisht asnjëri nuk i preku organet jetësore.
Pas ndërhyrjes kirurgjikale, ajo e kaloi rrezikun për jetën, ndërsa disa orë më pas blutë arrestuan si të dyshuar 25vjeçarin Xhenja. Ai u arrestua në një hotel në Shkodër, në të cilin ka deklaruar se ndodhej. Prokurori ngriti dyshime të forta se Xhenja mund të ketë krijuar lidhje përmes të dënuarve të tjerë në burg me biznesmenin Sadetin Sula (ish-kunati i Flutura Muçës), i cili ndodhet nën masën e sigurimit “Arrest me burg” për vrasjen e Suela Sulës. Motra e kësaj të fundit, Flutura thotë se atentati ndaj saj është porositur nga ish-kunati dhe se dy familjet vijojnë të jenë në konflikt. Ndërkohë, hipotezat dhe dyshimet e ngritura nga organi i akuzës janë hedhur poshtë nga avokati mbrojtës, Fatbardh Kadrija.
Sakaq, Sadetin Sula ka deklaruar se nuk është ai autor i vrasjes së bashkëshortes së tij, ndërsa familja e Suelës e akuzon atë si vrasës. Nga ana tjetër ka edhe një konflikt për fëmijët, të cilët mbahen nga tezja e tyre, Flutura Muça ndërsa familja e Sadetinit ka kërkuar që t’i mbajnë ata fëmijët.
ma.me
