Aleksandër Laho ka lënë dyert e Spitalit të Durrësit, 18 ditë pas atentatit në zonën e Shkozetit në Durrës, ku gjeti vdekjen 24 vjeçari Andi Maloku. Laho i njohur ndryshe edhe si “Rrumi”, është shoqëruar drejt banesës nga një autoambulancë dhe një patrullë policie.
Ai mori një plumb në nofull gjatë atentatit ndaj makinës ku ndodhej, ku në vendin e parë të saj ishte edhe prokurori Arian Ndoj. Ndërkohë, sipas burimeve ai do të mbahet nën vëzhgim të rreptë nga një patrullë policie, e cila do të qëndrojë në distancë nga shtëpia, por me mision të qartë.
Hyrjet-daljet e personave në shtëpinë e tij dhe jo vetëm janë detyrat e Policisë për këtë rast. Gjithashtu pritet që të ketë edhe një takim të prokurorëve me të, për të zbardhur detaje të tjera të atentatit. Nga ngjarja që shkaktoi jehonë të gjerë në media, mbeti i plagosur edhe prokurori, por pa pasoja për jetën.
Ndërsa shoferi i prokurorit, Andi Maloku ishte viktima e vetme e këtij atentati. Nuk dihet kush ka qenë objektiv i autorëve, por Policia thotë se mund të kenë qenë të plagosurit dhe jo shoferi që në fakt e pësoi.
Ndërkaq, i vetmi i arrestuar për ngjarjen është Redjan Rraja, që e ka mohuar atentatin, por edhe njohjen me të plagosurit dhe viktimën.
