Automjeti që u përdor për marrjen peng të Gaz Çollakut është i njëjtë me atë që u përdor për ekzekutimin e dy të rinjve te Torra në Durrës.
Burime nga grupi hetimor bëjnë me dije për “Panorama” se tashmë është verifikuar se automjeti tip audi rezulton i përdorur në të dy vrasjet, ate të Collakut dhe Ervin Kodrës dhe Endri Caushajt.
Influenca mbi trafikun e drogës dyshohet se çoi në ekzekutimin e Gazmend Çollakut, pas rrëmbimit.
Nga hetimet e kryera mbi krimin e radhës në Durrës është bërë lidhja e krimit me masakrën e ndodhur më 20 dhjetor, pranë të njëjtit vend ku u rrëmbye 34-vjeçari.
Ekzekutimi i tyre u bë pak metra larg vendit ku u rrëmbye, para se të qëllohej për vdekje, Gazmend Çollaku. Duket se autorët e kanë pasur synimin e tyre vrasjen e personit të tretë të grupit, këtë herë duke e bërë eliminimin e tij fizik jo në mes të qytetit, por në një zonë tjetër, ku trupi i viktimës mund të gjendej kollaj.
Dyshohet se edhe makinat e përfshira në dy ngjarjet të jenë të njëjtat. Në të dyja ngjarjet, autorët kanë përdorur makinë tip “Audi” të errët.
Njëra prej kamerave të portit ka fiksuar pamje ku, pas vrasjes së 20 dhjetorit, një “Audi” u largua me shpejtësi nga vendi i ngjarjes dhe tentoi të futej në hyrjen numër dy, e cila përdoret vetëm për të dalë nga porti, por pastaj iu drejtua Urës së Dajlanit, i ndjekur nga një “Benz” me ngjyrë të errët. Edhe autorët e rrëmbimit të Çollakut u paraqitën me “Audi A6” të zi.
