Konflikti për votat është bërë shkak për ngjarjen e ndodhur pasditen e së mërkurës në Kurbin, ku u qëllua me armë makina e ish-deputetit të Partisë Socialiste Armando Prenga. Në këtë konkluzion ka dalë policia pas veprimeve hetimore të kryera dhe pyetjes së personave që kishin dijeni rreth ngjarjes.
Sipas burimeve vëllai i ish-deputetit është përplasur fizikisht me babain e autorit të dyshuar të ngjarjes, i cili ishte vezhgues i koalicionit opozitar Bashkë Fitojmë. Gjithçka ndodhi pas kontestimit të dy votave në një kuti votimi, ndërsa për normalizimin e situatës, ditën e hënë u desh ndërhyrja e policisë.
Këta të fundit kryen të gjitha veprimet në lidhje me rastin dhe materialet hetimore u referuan në prokurori me një person të proceduar penalisht, i cili rezulton të jetë vëllai i ish-deputetit socialist, ndërsa rezulton se ky i fundit nuk ka qenë në ambientet e KZAZ në momentin e konfliktit verbal. Por kjo situatë duket se nuk është pritur mirë nga djali i vëzhguesit të opozitës Fatbardh Ismaili.
Dy ditë më vonë 29-vjeçari ka tentuar të marrë hak, duke qëlluar në drejtim të automjetit të ish-deputetit Armando Prenga i cili po lëvizte i vetëm në aksin rrugor Laç-Mamaurras. Autori qëlloi plot tre herë ndaj, tij por fatmirësisht asnjëri nga plumbat nuk e prekur 49-vjeçarin i cili njoftoi menjëherë policinë për atë çfarë i kishte ndodhur.
Blutë u vunë menjëherë në lëvizje, por pa arritur të lokalizojnë dhe prangosin e autorin e kësaj ngjarje i cili u largua me një automjet tip Benz. Për kapjen e tij që prej ditës se mërkure janë angazhuar dhjetëra forca policore, por pa mundur ende që ta lokalizojnë. 29-vjeçari Fatbardh Ismaili do të përballet me akuzat Kanosja me armë dhe mbajtja pa lejeve e armeve të zjarrit.
/s.f
