Zbardhen të tjera detaje nga vrasja e djeshme në Rrëshen, ku persona me maska ekzekutuan me breshëri ish-drejtorin e OSHEE, Saimir Jaku dhe plagosën shtetasin Gjergji Prenga.
Burime për “Panorama” bëjnë me dije se i plagosri në ngjarjen e djeshme, konkretisht Gjergj Prenga ka lidhje krushqie me deputeten e Partisë Demokratike në Mirditë, zonjën Albina Deda.
Mësohet se Prenga është krushu i deputetes, pasi djali i tij është i fejuar me vajzën e depuetes Deda.
Saimir Jaku, 33 vjeç, i cili deri para një jave mbante detyrën e drejtorit të njësisë së tensionit të lartë për Veriun, u ekzekutua me breshëri automatiku dje rreth orës 09:40, në një nga lokalet më të frekuentuara të Rrëshenit.
I plagosur mbeti edhe Gjergj Prenga, 50 vjeç, i cili ka qenë në të njëjtën tavolinë me Saimir Jakun. Ky i fundit mësohet se është babai i kryetarit të Forumit Rinor të PD-së për Rrëshenin (dhëndër i deputetes së Mirditës).
Ngjarja ndodhi në një distancë rreth 50 metra larg komisariatit të policisë, ndërsa në lokal ka pasur dhjetëra klientë të tjerë.
Një mjet “Benz” ka ndaluar para lokalit dhe një person i maskuar e me kallashnikov në dorë ka dalë me nxitim duke iu afruar tavolinës së Jakut. Ky i fundit ishte ulur jashtë, në një cep të lokalit. “Askush të mos lëvizë. Nuk kemi punë me ju”.
Kështu iu është drejtuar autori klientëve që kanë tentuar të çohen nga tavolinat dhe të largohen. Më pas ai ka qëlluar me breshëri në një distancë shumë afër shënjestrën e tij, duke e lënë të vdekur në vend.
