Pak agjentët e Principatës së Monakos dhe forcat e rendit franceze janë ende në kërkim të një personi me pantallona të çelëta dhe një kapelë të zezë, i cili të hënën në mbrëmje u filmua nga kamerat e sigurisë pasi la një çantë shpine me një bombë përpara ndërtesës ku jeton Vadim Ermolaev, 58 vjeç, një biznesmen shumë i pasur me origjinë ukrainase, por që ka marrë shtetësinë qipriote në vitin 2019.
Një furgon i policisë shkencore ndodhet ende i parkuar përpara hyrjes së ndërtesës.
Sipas një burimi pranë hetimeve për Corriere della Serra, djali është hedhur rreth 15 metra larg nga shpërthimi. Nëna e tij dje ishte ende në gjendje kritike dhe ka humbur të dyja këmbët. Sipas të njëjtit burim, analizat e para sugjerojnë se nëna ka tentuar ta mbrojë djalin në momentin e shpërthimit dhe për këtë arsye ka pësuar plagët më të rënda.
Tentativa për vrasje ka tronditur qetësinë e këtij mikro-shteti prej dy kilometrash katrorë dhe rreth 40 mijë banorësh, me një popullsi ndërkombëtare dhe shumë të pasur.
Princi Albert II e ka dënuar në një deklaratë këtë “krim të neveritshëm”, që përbën “një tronditje për të gjithë komunitetin monegas”. Shumë miliarderë nga Lindja kanë zgjedhur Principatën për reputacionin e saj si vend i qetë. Mes tyre është Seyar Kurshutov, një biznesmen nga Krimea, mik i ngushtë i Ermolaev. Ai ka thënë se shoku i tij ishte “i fiksuar” pas sigurisë së vet, duke shtuar se “Vadimi jetonte në tehun e thikës”.
Sipas burimeve të policisë ukrainase, atentati në Principatë lidhet me botën e mashtrimeve të call center-ave, një rrjet mashtrimesh financiare në shkallë të gjerë në Evropë, ku familja Ermolaev është e përfshirë fort.
Mes viteve 2019 dhe 2022, këto struktura kanë zhvatur mbi 100 milionë euro nga mijëra kursimtarë evropianë, veçanërisht në Gjermani, Estoni dhe Ukrainë, përmes investimeve të rreme në kriptovaluta ose edhe konsulencave për çështje divorci.
Atentatori ka humbur gjurmët në Beausoleil, në territorin francez, dhe po kërkohet me ndihmën e dy helikopterëve. Në orët e fundit, hipoteza më e mundshme e hetuesve është se ai ka arritur në Itali. Për motivin dhe urdhëruesit, prokurori i përgjithshëm i Monakos, Stéphane Thibault, ka shmangur çdo koment në konferencën për shtyp, duke refuzuar edhe të konfirmojë zyrtarisht identitetin e objektivit, Vadim Ermolaev.
Përveç një larjeje hesapesh në kuadër të mashtrimeve të call center-ave, hetuesit po ndjekin edhe pistën e një operacioni të organizuar nga SBU, shërbimi sekret ukrainas, i cili mund të ketë ndërmarrë një paralajmërim ndaj biznesmenëve të konsideruar si tradhtarë të Ukrainës dhe të afërt, për interesa personale, me pushtetin rus.
