Një skuadër e përbërë nga 8 anëtarë, dhe e mirë-organizuar në logjistikë dhe armatim, në datën 10 maj 2019 në Vlorë, ka tentuar të vrasë në një atentat mafioz pranë kompleksit “Oslo”, Inez Hajrulla. Grupi ka vepruar me role paraprakisht të ndara, ku tre kanë qenë në grupin e zjarrit, dhe pesë në rolin e vëzhguesit të objektivit dhe ndihmësit për largimin e autorëve nga vendngjarja. Shtatë persona nga kjo skuadër momentalisht janë arrestuar, ndërsa një person i tetë, i quajtur Fatmir Hyseni (Elidon) Musaj ose “Doqia” i Vlorës dhe pjesë e grupit të zjarrit është shpallur në kërkim. Në mëngjesin e 10 Majit 2019 Inez Hajrulla, person me precedent penalë, ka qenë në shoqërinë e disa shokëve të tij në lokal, që ndodhet në kompleksin “Oslo” në Vlorë, kur nga dy armë automatike janë lëshuar breshëri plumbash drejt tavolinës së tyre.
Hajrulla nuk ka marrë asnjë dëmtim, kjo falë edhe reagimit të tij me një pistoletë që atë ditë e kishte me vete. I vetmi person që ka marrë një plumb në këmbë, ka qenë një punonjës i bashkisë Vlorë, Dajko Cenodemaj, që ishte rastësisht në një lokal tjetër. Sot kur janë mbushur 10 muaj nga kjo ngjarje, prokuroria dhe policia e Vlorës kanë identifikuar 8 persona si pjesëmarrës në këtë atentat, ku momentalisht 7 janë arrestuar dhe ndodhen në burg, ndërsa personi i 8 dhe kryesori i kësaj skuadre, është shpallur në kërkim. Katër prej këtyre personave si të implikuar në këtë atentat, janë arrestuar në datën 15 nëntor 2019, të cilët quhen Albano Goxhaj nga Fieri, Ardjan Ahmeti Tirana, Dejvison Serjani menaxher i një klubi nate të njohur në Tiranë si dhe Daut Elmazi, ky i fundi nipi i Armando Sulejmanijt ose “Çipurit” që momentalisht ndodhet në burg.
Ndërsa dy ditë më parë në Vlorë është prangosur Xheladin Merko, person që dyshohet se ka ndihmuar grupin e zjarrit, të largohet dhe përkrahur autorët, pas krimit dhe djegies së makinave. Operacioni policor “Gjurmimi” është shtrirë deri në Itali, ku pikërisht në këtë shtet, janë arrestuar Gentian Dauti vs Zoto dhe Igli Sulioti vs Memaj. Për të dy këta persona momentalisht nga ana e prokurorisë së Vlorës është dërguar letër-porosi në Itali, me qëllim ekstradimin e tyre në Shqipëri. Ndërkohë në kërkim vijon të jetë Fatmir Hyseni (Elidon) Musaj ose siç njihet ndryshe në Vlorë me nofkën “Doqja”, ose kunati i “Didit” të Vlorës. Ky person momentalisht nuk është mundur të arrestohet nga policia e Vlorës, ndërkohë që emri i Fatmir Hysenit, rezulton në kërkim edhe për ngjarjen e vrasjes nga klani “Duka”, të ish-policit Santiago Malko në Tiranë, mikun e Ervis Martinaj. Zbulimi në këto dy ngjarje kriminale në Vlorë dhe Tiranë, ka bërë që për Fatmir Hysenin tashmë të jenë lëshuar dy vendime arrestimi, nga gjykata e Vlorës dhe ajo e Krimeve të Rënda në Tiranë. Por për Hysenin dhe skuadrën e tij bien dyshime të forta se kanë qëlluar edhe mbi Edison Harizaj dhe shokut të tij Genci Caci në Durrës, por ende nuk ka një urdhër-arresti për këtë ngjarje.
Sipas dinamikës së atentatit ndaj Hajrulla, të ndërtuar nga prokuroria e Vlorës tre persona që dyshohet të jenë grupi i zjarrit janë Fatmir Hyseni, Gentian Dauti dhe Igli Memaj. Ndërsa 5 personat e tjerë janë në rolin e vëzhguesit dhe ndihmësit të tre personave që janë afruar dhe kanë qëlluar. Në dosjen hetimore thuhet se:”…personat e mësipërm veprojnë në disa qytete si vrasës me pagesë. Për realizimin e vrasjes, këta persona pasi marrin porosinë, organizohen dhe hyjnë në veprim me Igli Memaj dhe Gentian Dautaj, të cilët pasi mbajnë në vëzhgim për disa ditë personat objekt sulmi dhe pasi studiojnë lëvizjet e tyre, organizojnë vrasjen. Për të kryer vrasjen ata marrin makina të vjedhura nga lidhjet e tyre në zonën e Fushë-Krujës. Pas çdo krimi të kryer, ata e djegin automjetin me qëllim zhdukjen e provave dhe largohen në këmbë ose me automjete të tjera, që i presin në afërsi të vendit ku kanë planifikuar djegies e automjetit…”.
Zbulimi i këtyre emrave tregon edhe një herë tjetër se atentati ndaj Hajrulla, është kryer si rezultat i larjeve të hesapeve mes grupeve rivale në Vlorë, luftë kjo që është ndezur prej disa vitesh dhe nuk dihet se ku do përfundojë. Policia dhe prokuroria e Vlorës e lidhin këtë atentat me ngjarjen e 17 shkurtit 2019, ku mbetën të vrarë dy persona dhe u plagos lehtë Armando Sulejmani ose “Çipuri”. Ky i fundit në 17 shkurt 2019 i shpëtoi një atentati mafioz me 78 plumba kallashnikovi, ku vetë Çipuri mori dy plumba në këmbë ndërsa dy personat që e shoqëronin në makinë, Arjan Hasanaj dhe kunati i “Çipurit” Resti Rexho janë bërë shoshë, duke gjetur vdekjen e menjëhershme. Ngjarja ka ndodhur në orën 12:30, kur lagjia e “Ujit të Ftohtë” në Vlorë është përfshirë në “luftë”, pasi të shtëna të shumta armësh, janë dëgjuar në rrugën “Dhimitër Konomi”, aty ku po udhëtonin me një mjet tip “Passat” tre personat Arjan Hasanaj, Resti Rexho dhe Armando Sulejmani. Pikërisht në këtë atentat “Çipuri” ka qëlluar plot 6 herë me një pistoletë prodhim amerikan me mulli të tipit “Magnum SW 357 SMITH WESON”. Për këtë armë, Armando Sulejmani është arrestuar dhe vijon të jetë ende në burg. Goditja frontale për të eliminuar “Çipurin”, ngriti dyshime të forta, se atentati ishte mirë organizuar nga anëtarët e grupit rival. Katër muaj nga ky atentat me 78 plumba, në kompleksin “Oslo” sulmohet me dy kallashnikovë për tu vrarë Inez Hajrulla. Autorët largohen përmes Vlorës, përballë bashkisë, dhe askush nuk i ndalon, megjithëse përplasen me një automjet të rastit. Sot dhjetë muaj pas kësaj ngjarje 7 persona janë arrestuar dhe një i 8-të, Fatmir Hyseni është shpallur në kërkim./ shqiptarja.com
Fatmir Hyseni alias Elidon Musaj, Gentian Dauti ,Igli Memaj alias Sulioti
g.kosovari
