Ismet Çekorja, babai i Bajram Çekores i arrestuar për atentatin ndaj Alban Bruçit në 25 gusht, ka dalë në një deklaratë për mediat, ku shfajson të birin, duke thënë se nuk ka asnjë lidhje me ngjarjen. Sipas tij, kjo bëhet pasi janë bërë bashkë një grup banditësh së bashku me njerëz me pushtet që duan ta mbajnë në burg, pasi e kanë frikë. Arsyen, se përse e kanë frikë, nuk e bën me dije, por shton se sa herë ndodh një ngjarje kriminale, ai me familjen thirren gjithnjë në polici.
“Policia ka ardhur në banesën tonë pas vrasjes së Arjan Ferracakut një kohë që viktima ishte nipi im po ashtu kur u vra edhe Fatos Ferracaku prap më kanë thirrur mua dhe djalin. Pastaj janë vrarë vëllezërit Bilali dhe sërish policia në banesën time një kohë që kemi kaq shumë vite që jemi fqinj. U plagos Admir Bajri, prap në banesën time një kohë që familja jonë e ka patur një lloj njohje me familjen e tyre. Po ashtu u qëllua shefi i policisë bashkiake të Malësisë së Madhe sërish në banesën time kur në fakt autorët dolën krejt persona të tjerë. Rasti i fundit është me Alban Bruçin, djalin e Lad Bruçit të cilin unë e kam shumë mik dhe nuk ka asnjë shans që djali im të qëllojë djalin e tij kur ne kemi shumë miqësi aq më tepër që Bajrami, djali im është i monitoruar me kamera.
Këto sulme ndaj familjes tonë i bëjnë disa bandit, hajdutë biçikletash dhe banditë të veshur me pushtet. Se cila është arsyeja ne nuk e dimë. Ajo që kërkojmë është drejtësia. Djali im është i pafajshëm dhe nuk ka marrë pjesë në asnjë prej ngjarjeve kriminale për të cilat është i dyshuar. Janë të gjithë inskenime dhe tani ai duhet të qëndrojë rrugash dhe nuk mundet as të punojë as asgjë. Kërkojmë drejtësi dhe të zbardhen ngjarjet” , është shprehur Ismet Çekorja.
Duke i dalë në mbrojte, ai thotë se disponon një video ku shfaqet se i biri që tregon se nuk ka gisht në atentat. Mirëpo, këtu ka një kontradiktë! Kjo pasi referuar njoftimit të policisë, atentati ka ndodhur rreth orës 21:30 e ndërsa momenti i filmuar në video për të cilën Çekorja e pretendon si provë, është 20:54, pra pak minuta para se të ndodhte ngjarja. Report Tv kontaktoi me Ismet Çekorja lidhur me këtë detaj, duke thënë se policia ka raportuar gabim orën, pasi atentati ka ndodhur më parë. Në video, shfaqet Bajram Çekorja së bashku me një person teksa dalin nga një banesë.
Alban Bruçi u qëllua me 19 plumba më 25 gusht në Shkodër, por arriti që të shpëtojë pa u plagosur. 25 vjeçari shkoi vetë në polici dhe bëri një kallëzim për këtë atentat për të cilin policia ka shpallur në kërkim Bajram Çekorja dhe Tonato Fusha, djali i biznesmenit dhe ish-presidentit të Vllaznisë Valter Fushës.
g.kosovari
