Përpjekja e Redian Rrajës për t’u liruar nga qelia me një vendim të Gjykatës së Lartë ka rezultuar pa sukses.
Kjo gjykatë ka lënë të pandryshuar masën e sigurisë “arrest në burg” dhënë nga Apeli për 34-vjeçarit të dyshuar si atentator i prokurorit të Durrësit, Arjan Ndoja.
Kolegji tre anëtarësh ka vendosur në dhomë këshillimi të mos pranojë rekursin e paraqitur nga Rraja. Në kundërshtimin e paraqitur në Gjykatën e Lartë Rraja pretendonte se dy vendimet e shkallëve më të ulëta që e lanë në qeli ishin haptazi në kundërshtim me ligjin.
Në rekurs thuhej se prokuroria nuk kishte asnjë provë, që mund të ngrinte dyshime për përfshirjen e Rrajës në krim. Por në vendim, gjyqtarët Ilir Panda, Sokol Sadushi e Ilir Pupe arsyetonin se rekursi i Rrajës nuk përmbante asnjë nga shkaqet ligjore për të cilat mund t’i drejtohesh Gjykatës së Lartë.
Në atentatin e 1 nëntorit pranë mbikalimit të Shkozetit, në aksion Durrës-Tiranë, u plagos prokurori Ndoja, miku i tij Aleksandër Laho, i njohur si “Rrumi” dhe shoferi Andi Maloku, i cili ndërroi pak ditë pas ngjarjes. Redian Rraja akuzohet për pesë vepra penale mes të cilave “vrasje e funksionarëve publikë”, mbetur në tentativë dhe “grup të strukturuar kriminal”.
Përveç tij, për atentatin ndaj prokurorit është arrestuar dhe lënë në burg si i dyshuar edhe Arjol Halilaj.
