E përditësuar/ Zbulohet identiteti i viktimës. 32 vjeçari quhet Refit Toro dhe është një person me precedent penal. Sipas të dhënave i riu ishte kthyer prej disa kohësh në vend dhe jetonte në Tiranë. Viktima kishte ndërruar emrin nga Jetnor në Refit Toro.
Pavarësisht të dhënave të reja, motivi i ekzekutimit mbetet ende mister.
I çuditshëm mbetet fakti se në të njëjtin vend është ekzekutuar rreth një vit më parë një 52 vjeçar me emrin Hyqmet Nexhipi, pronar i një peshkarexhe, i cili u gjet i vrarë si në rastin e sotëm, brenda makinës së tij.
…..
Një 32 vjeçar është ekzekutuar me armë zjarri kallash nikov këtë pasdite në Vlorë, në lagjen e njohur si Skela.
Viktima me inicialet R.T është ekzekutuar në makinën e tij tip fuoristradë me targa AA 606 LD në mes të rrugës.
Policia është në kërkim të killerit që ka kryer ekzekutimin dhe ka vënë një sërë posto- blloqesh në qytet./java/a.k
NJOFTIMI I POLICISË
Rreth orës 17:57, në vendin e quajtur “Ish-Parku i Tregtisë”, në rrugën e kësaj zone është qëlluar me armë zjarri një shtetas, i cili për shkak të plagëve në trup ka ndërruar jetë rrugës drejt Spitalit Rajonal.
Policia ka identifikuar viktimën me gjeneralitetet R.T., 32 vjeç, banues në Vlorë.
Dyshohet se autori pasi ka kryer krimin është larguar me shpejtësi me një automjet, për të cilin po punohet për zbulimin e tij.
Grupi hetimor ndodhet në vendngjarje dhe po kryhen veprimet hetimore në lidhje me dokumentimin e plotë të kësaj ngjarjeje.
Janë ngritur pika kontrolli në rrugët dalëse dhe hyrëse të qytetit të Vlorës me qëllim kapjen e autorit.
