Sulmuesi shtatlartë, Atdhe Nuhiu, ka vendosur të luajë për Përfaqësuesen e Kosovës. Lajmin për vendimin e 27-vjeçarit e ka bërë të ditur të hënën trajneri i Përfaqësues së Kosovës, Muharrem Sahiti, shkruan Koha Ditore.
Trajneri Sahiti ka thënë se Nuhiu të hënën ka qëndruar në Prishtinë kur edhe ka nisur procedurat për pajisje me pasaportë të Kosovës.
Nuhiu i lindur në Prishtinë ka qenë pjesë e ekipit U-21 të Austrisë. Për ekipin Shpresa të Austrisë ka shënuar shtatë gola në 13 ndeshje. Ai është lojtari i dytë me shtetësi austriake pas Sinan Bytyqit, që vendos të luajë për Kosovën.
“Atdhe Nuhiu ka qenë në Kosovë dhe i ka nisur procedurat për pajisje me pasaportë. Ai ka pranuar të luajë për Kosovën, por ka mbetur të zgjidhet çështja e nënshtetësisë. Nuhiu ka lindur në Prishtinë. Është një sulmues i nevojshëm për Kosovën, pasi do ta shtonte edhe më shumë konkurrencën në sulm.
Çdo lojtar është i mirëseardhur, në këtë kohë apo edhe në të ardhmen. Dyert e Kosovës do të jenë të hapura për çdo futbollist që ne mendojmë se është i nivelit konkurrues”, ka thënë Sahiti, ndihmësi i përzgjedhësit Albert Bunjaki.
Nuhiu në dy ndeshje për U-20 të Austrisë ka shënuar një gol, kurse ka luajtur edhe një ndeshje për U-19. (b.an)
