Astronomët kanë zbuluar fillimin e grumbullimit të 14 galaksive që në të ardhmen do të “përplasen” me njëra-tjetrën.
Shkrirja e tyre është e destinuar të kthehet në një nga strukturat më masive të universit: një përzierje galaktikash të lidhura gravitacionalisht nga materia e errët, që “notojnë” në një “det” gazi të nxehtë dhe të jonizuar.
Duke përdorur observatorin e avancuar të vendosur në shkretëtirën e Atakamës, një ekip ndërkombëtar shkencëtarësh kanë zbuluar rritjen e përqendrimit të 14 galaktikave, që do të formojë përzierje kolosale.
Kjo përzierje ndodhet 12.4 miliardë vite-dritë larg nesh, që do të thotë se drita e saj është nisur drejt nesh kur universi ishte vetëm 1.4 miliardë vjeç, pra sa 1/10 e moshës aktuale.
Galaksitë që përbëjnë këtë përzierje formojnë yje 1000 herë më shpejt se Rruga e Qumështit dhe janë përqendruar brenda një rajoni hapësinor vetëm 3 herë më i madh se galaksia jonë. Kjo megagalaksi do të rivalizojë me disa prej grupimeve më masive që shohim në univers sot.
Astrofizikani Scott Chapman thotë se fakti që një shkrirje e tillë po ndodh kaq shpejt në historinë e universit përbën një sfidë për kohën tonë dhe të kuptuarit e mënyrave se si strukturat formojnë universin.
Gjatë miliona viteve të historisë kozmike, materia normale dhe ajo e zezë filluan të gjeneronin përqendrim kozmik gjithnjë e më të madh, duke krijuar përzierje galaksish, që konsiderohen si objektet më të mëdha të njohura në univers.
Me masa afërsisht 1 milion herë më të mëdha se Dielli ynë, këto struktura përmbajnë mijëra galaksi, sasi të jashtëzakonshme të materies së zezë, vrima të zeza gjigante dhe rrezatim X që çliron gaze me temperatura mbi 1 milion gradë. (TemA TV)
