Astrit Patozi është shprehur në një inervistë për ABC News, se “Bindja Demokratike” ka arritur ti plotësojë në kohë të gjithë afatet dhe kërkesat ligjore, për zgjedhjet e 30 qershorit.
Ai gjithashtu është shprehur për dorëheqjen e kandidatit të Lezhës, Salvador Kaçaj, se nuk ka asnjë reagim zyrtar dhe se vetë kandidati, nuk i ka bërë ende me dije asgjë.
Gazetarja Mirela Milori e ka pyetur Patozin se nëse ka patur probleme mes “Bindjes Demokratike” dhe kandidatit Salvador Kaçaj dhe nëse është informuar më parë për këtë reagim të tij, por Patozi e ka mohuar të ketë patur probleme mes tyre.
“As e pohoj as e përgënjeshtroj këtë fakt, sepse personi vetë nuk ka ardhur dhe është qesharake, që brenda 1 minute të bëhet i ditur kandidimi dhe heqja dorë.
Edhe ju vetë nuk keni marrë një reagim personalisht nga Kaçaj për këtë.
Gjithsesi, në çdo betejë qëndrojnë ata që kanë këllqe dhe ikin ata qe s’kanë këllqe.
Bindja Demokratike do eci përpara dhe ne jemi të vendosur.
Pres që kjo gjë të zbardhet dhe të vijë vetë personi të na e bëj të ditur”, u shpreh Patozi.
Gazetarja: Në fakt duket se ka probleme dhe mes jush, sepse pak pasi KQZ regjistroi për kryetar bashkie në Lezhe ka qënë Salvador Kacaj që shpall dorëheqjen nga gara e 30 qershorit nën siglën tuaj madje thotë që beteja e opozitës për zgjedhje të lira dhe të ndershme është e drejte, duhet përkrahur pa asnjë rezervë por pa opozitën e vërtetë, PD-në, ato do të ishin shkatërrimtare për qytetarët e Lezhës thotë Z.Kacaj. Ju i dinit përpara idetë e tij apo i mësuat pas deklaratës për shtyp?
Astrit Patozi: Tani unë do ju bëj një pyetje megjithëse nuk është etike. Nga e dini ju këtë deklaratë, ku e keni mësuar?
Gazetarja: Na erdhi në media në redaksitë tona.
Astrit Patozi: Edhe unë po ashtu si ju jam informuar nga media ndërkohë që edhe për etikë duhej që njeriu që erdhi të merrte kandidimin në zyrën time disa herë duhej që të vinte vetë dhe të jepte edhe moskandidimin, pra tërheqjen. Kjo nuk ka ndodhur pra unë as nuk e përgënjeshtroj as se pohoj një fakt të tillë se dua të kem një fakt, dhe fakti është që të vijë njeriu vetë. Ai nuk ka ardhur ende.
Unë jam i informuar, çuditërisht se është pak komike, në të njëjtën kohë që një portal po jepte lajmin qe kandidati i BINDJES DEMOKRATIKE Salvador Kacaj regjistrohet nga KQZ-ja dhe po ashtu kandidati i BINDJES DEMOKRATIKE tërhiqet, pra gati në një sekondë. Ishte pak qesharake të them të drejtën edhe më vonë me vjen një mesazh në celular ku ky burri me fliste për mirënjohje dhe falenderime në adresën time. Unë përfytyrova skenën dhe mendova tre njerez, një njeri që ja kerkonte këtij: Të lutem terhiqu, bëje për mua.
Një njeri tjetër që i merrte përsipër t´i shkruante tekstin, se teksti (që u botua nga shtypi) s´kishte lidhje fare me tekstin që më erdhi mua dhe këtë ditëziun e fundit pastaj që donte ta kishte mirë edhe me mua megjithëse kishte bërë këtë gjë. Tani kjo është një betejë, dhe në çdo betejë qëndrojnë ata që kanë këllqe dhe ikin ata që nuk kanë këllqe dhe kjo është universale dhe s´ka të bëjë vetëm me zgjedhjet tona.
BINDJA DEMOKRATIKE nuk impresionohet nga kjo gjë domethënë sado që të përpiqen, sado të qajnë, të ulërasin, të akuzojnë, të kërcënojnë, BINDJA DEMOKRATIKE do ecë përpara dhe ne jemi shumë të vendosur në rrugën tonë. Kaq është e gjitha.
Unë e para pres që të zbardhet, të vijë njeriu vetë. Mbase nuk vjen dot ose mbase nuk e ka bërë këtë gjë por deri sot që po flasim është kjo situatë. Pra unë nuk kam asnjë koment më shumë për të bërë për këtë ngjarje që është sa qesharake aq edhe e pisët. (Tema)
