Deklarata e ish-kryeministrit Sali Berisha për armatosjen e qytetarëve shqiptarë, ka bërë jehonë edhe në mediat ndërkombëtare, përveç atyre lokale. “Washington Post” shkruan sot se, ish-kryeministri shqiptar Sali Berisha u bëri thirrje këtë të enjte qytetarëve që të armatosen, duke thënë se qeveria nuk po arrin të përballet me krimin.
“Duke folur në seancën javore parlamentare, Berisha akuzoi qeverinë për lidhje me bandat e krimit dhe tha se nuk ka asnjë mënyrë tjetër për sigurinë publike. Berisha gjithashtu bëri thirrje për një ligj të ri për të lejuar posedimin e armëve. Armëmbajtja aktualisht është e paligjshme në Shqipëri dhe thirrja e tij është kundër ligjit gjë që mund të dënohet me 10 vjet burg”, shkruan “WP”.
Më pas tabloidi amerikan përcjell deklaratën e Berishës: “U bëj thirrje të armatosen”.
Duke iu drejtuar qeverisë së kryeministrit Edi Rama, ai shtoi: “Nëse ju, si një organizatë kriminale mendoni të terrorizoni opozitën dhe qytetarët, unë garantoj se opozita dhe qytetarët janë të gatshëm të kthehen tek ju me të gjitha mjetet, në mënyrë që ju të mos dini ku të futeni”, përcjell “WP”.
“Washington Post” risjell në vëmendje vitin 1997, kohë në të cilën vendi u përfshi në një kaos pas dështimit të skemave piramidale.
“Në vitin 1997 Berisha, atëherë president i vendit, u rrëzua pas një revolte popullore dhe për muaj të tërë vendi u përfshi në anarki, pasi njerëzit humbën kursimet e tyre në skemat e dështuara piramidale. Pothuajse të gjitha depot e ushtrisë u plaçkitën dhe shumë nga këto armë mund të gjenden ende në Shqipëri, shtet anëtar në NATO që nga viti 2009”.
Associated Press
Deklarata e ish kryeministrit, Sali Berisha, për armatosje, pasi, sipas tij, qeveria ka dështuar në përballjen me krimin, është bërë objekt shkrimesh edhe në mediat ndërkombëtare. Associetadet Press shkruan se Berisha, i larguar si kryeministër pas humjes në zgjedhjet e vitit 2013, ka akuzuar qeverinë si të lidhur me bandat kriminale. “Mbajtja e armës në mënyrë të paligjshme në Shqipëri dhe thirrjet për të thyer ligjin dënohen me 10 vite burg. Ministri i Brendshëm, Saimir Tahiri, një nga personat e kritikuar nga Berisha, ka kërkuar nga Prokuroria të nis procedism”, shkruan AP.
Deklarata shkaktoi përplasje mes opozitës dhe mazhorancës në sallën plenare, por vetë ish kryeministri dhe deputetët demokratë u justifikuan me argumentin se Berisha i referohej sistemit amerikan dhe se ky veprim mund të realizohej vetëm nëpërmjet miratimit të ligjit.
