Kryetari i Partisë Demokratike, Sali Berisha, ka reaguar me një deklaratë për media mbi situatën e zjarreve në vend, duke e konsideruar atë si jashtë kontrollit.
Po ashtu, Berisha u ndal dhe te mënyra e trajtimit të zjarrfikësve dhe punonjësve të angazhuar në shuarjen e flakëve nga qeveria, duke theksuar se është cinik. Ai thekson se zjarrfikësve nuk u janë dhënë ende shtesat e premtuara për vështirësitë dhe rrezikun me të cilin përballen gjatë punës.
“Trajtimi i zjarrfikësve dhe punonjësve të angazhuar në shuarjen e flakëve të zjarrit, është cinik, i pashpirt. Asnjë qindarkë nga premtimet, dhe që i meritojnë, të shtesave për vështirësitë e mëdha përballë zjarrit, atyre gjer sot nuk u është dhënë”, tha ai.
Berisha u ndal gjithashtu edhe tek mungesa e mbështetjes logjistike për punonjësit në terren, duke e cilësuar punën e tyre si “tmerrësisht të vështirë dhe të rrezikshme”.
“Asnjë prapavijë mbështetëse për punën tmerrësisht të vështirë dhe të rrezikshme që bëjnë, nuk kanë”, tha ai.
