Aksionit të Bashkisë së Tiranës për lirimin e hapësirave publike në Njësinë Administrative nr. 5 nuk i ka shpëtuar as shkolla “Kristaq Rama”. Për më shumë se 20 vite ky objekt arsimor i ka shpëtuar çdo fushate dhe ndërhyrje nga ana e bashkisë apo të qeverisë.
Madje, sa herë flitej për ndërhyrje dhe lirimin e hapësirave publike, sfida e madhe për të gjithë ishte lirimi i trotuarit që kjo shkollë ka uzurpuar në zonën e Komunës së Parisit, aq sa kalimtarët duhet të rrezikonin jetën duke kaluar në rrugën me makina. Gjithashtu, ndërhyrja e bashkisë në shkollën “Kristaq Rama” u pa nga media të ndryshme dhe qytetarët edhe si një bankë prove për kryebashkiakun Veliaj, të cilën me sa duket ai e ka kaluar me sukses.
Siç shihet edhe nga fotot, ditën e sotme, Bashkia e Tiranës ka vijuar aksionin për prishjen e ndërtesës deri në rikthimin e hapësirës së zaptuar në trotuar për banorët e zonës së Komunës së Parisit. Ndërkaq, mësohet se emri i kësaj shkolle nuk ka asnjë lidhje me familjen e kryetarit të qeverisë, Edi Rama, por drejtuesit e saj me sa duket e kanë vendosur këtë emër për efekt marketingu e reklame.
Në ditën e gjashtë të aksionit të Bashkisë së Tiranës për lirimin e hapësirave publike janë prishur dhjetëra shtesa pa leje apo uzurpime te çdo lloji. Aksioni është i ndarë në tre faza, ku fillimisht bëhet prishja e hapësirave të zëna, pastaj bëhet rehabilitimi dhe në fund Bashkia e Tiranës bën rikualifikimin e zonës në funksion të banorëve.
kryesor
