Inspektorati Shtetëror Shëndetësor kërkon rishikim të ligjit sa i përket masave ndëshkuese për subjektet që shkelin ligjin. Në një intervistë për televizionin SCAN, inspektorja e ISHSH Teuta Dinaj tha se inspektorati po kërkon ndryshime të ligjit si në ashpërsimin e masave, ashtu edhe për mos lejimin e cigares elektronike dhe të shishave në ambientet e mbyllura.
“Problem tjetër që ne kemi hasur në punën tonë dhe e kemi paraqitur përpara këtij komisioni për ndryshimin e ligjit është edhe koncepti i duhanpirjes. Domethënë, përkufizimi në ligj duhet të jetë akoma dhe më i qartë, që do të thotë çfarë nënkuptohet me këtë duhanpirje. Jo vetëm cigarja që ne kemi parasysh, por procesi në tërësi i duhanpirjes, qoftë edhe procesi që bëhet përmes mjeteve të tjera siç mund të jetë shisha, cigarja elektronike; ato përmbajnë produkte të duhanit. Pra, duhet të ketë një qartësi më të mirë të këtij termi”, tha Dinaj.
Sipas statistikave të Ministrisë së Shëndetësisë, duhani është shkaktar për një në katër vdekje prej sëmundjeve kardiovaskulare. Në rastet e tumoreve, ky ndikim është edhe më i lartë, duke arritur në mbi 83% të vdekjeve nga kanceri i mushkërive. Në vendin tonë, përqindja ditore e duhanpirësve është rreth 48% nga meshkujt mbi 15 vjeç, por vihet re një tendencë uljeje. Ndërsa te gratë, ka një tendencë rritjeje nga 5, në 10%
Adoleshentët që përdorin cigare elektronike janë të ekspozuar ndaj kimikateve që shkaktojnë kancer pothuajse njësoj si personat që konsumojnë duhan.
Pavarësisht se cigarja elektronike është krijuar me idenë që të ulë numrin e përdorueseve të duhanit i cili është dhe shkaktari kryesor i kancerit të mushkërive dhe të mëlçisë, ndikimi që ka në organizëm cigarja elektronike është po i njëjti.
Të dhënat tregojnë se personat që përdorin cigare elektrike kanë 3 herë më të lartë nivelin e kimikateve toksike në krahasim se njerëzit normalë, ndërsa personat që konsumojnë dhe cigare elektrike dhe duhan e kanë 6 herë më të lartë.
a.ç
