Shqiptarët do duhet të përgjigjen nëse janë dakort me vendosjen e një ashpërsimi ekstrem të dënimeve për autorët përsëritës të krimeve kundër personit. Këtë e bëri me dije kryeministri Edi Rama teksa prezantoi nismën e Këshillimit Kombëtar për Shqipërinë ku do të ketë një kuvendim popullor mbi çështje me rëndësi strategjike për vendin.
“Duke pasur parasysh se një pjesë e opinionit kërkon ashpërsim ekstrem në dënimin e autorëve përsëritës të krimeve kundër personit, por në të njëjtën kohë kjo përbën edhe një sfidë në raport me standarte të caktuara apo gjithë procesin tonë që është i lidhur me botën ku jetojmë ne duam nga qytetarët opinionin e tyre”, tha Rama.
Kujtojmë që krimi i rëndë që tronditi Fierin disa javë më parë, ku 8-vjeçari Mateo Vasiu u vra nga fqinji i tij, person me precedentë penalë, ndezi debatin për rikthimin e dënimit me vdekje.
Familjarët e të miturit madje kanë dorëzuar edhe një peticion ku kërkojnë dënimin me vdekje të autorit që vrau 8 vjeçarin.
g.kosovari
