Ashensori hapësinor quhet projekti revolucionar i një kompanie kanadeze, që tashmë ka marrë patentën nga autoritetet e Shteteve të Bashkuara për t’u zhvilluar. Bëhet fjalë për një kullë 20 kilometra të lartë, në majë të së cilës do të ndërtohet një platformë nga ku do të nisen anijet hapësinore.
Projektuesit kanadezë të Thoth Technology thonë se në lartësinë 19 km mbi sipërfaqen e tokës, presioni i ajrit është shumë i vogël. Kjo redukton kohën e ngritjes së anijeve hapësinore dhe ul me mbi 30% konsumin e karburantit. Projekti parashikon edhe pajisje të posaçme që bëjnë të mundur balancimin e kullës, për të shmangur rënien prej kushteve jo të mira atmosferike.
Transporti nga sipërfaqja e tokës deri në majë parashikohet të bëhet me një ashensor. E quajtur ndryshe edhe si kulla hapësinore e Babilonisë, ajo mund të përdoret edhe për qëllime të tjera, për turizën, kërkime shkencore, telekomunikacion dhe për prodhimin e energjisë nga erërat.
Projekti, në dukje fantashkencë, është ende në fazat e konceptimit dhe nuk është përcaktuar as vendi, ku kjo kullë mund të ngrihet.
