Kuvendi i Shqipërisë së shpejti do të pajiset me ashensor në mënyrë që deputetët të mund të shkojnë në zyrat e tyre. ky lajm i publikuar sot nga gazeta “Rilindja Demokratike” ka marrë përgjigjen nga Kryesia e Kuvendit, i cili ka konfirmuar këtë lajm.
Në një komunikatë për mediat, zëdhënësi i Kuvendit Emiljano Aleksi ka sqaruar se ky ashensor nuk do përdoret nga Meta, por deputetët e Kuvendit. Sipas Aleksit, kjo bëhet jo vetëm për deputetët por edhe për aksesueshmërinë e personave me aftësi të kufizuar. Mbi të gjitha siç thuhet në komunikatë, kryeparlamentari Meta ka ende objektiv të bjerë nga pesha, dhe ndaj nuk do ta përdorë ashensorin.
“Kuvendi i Shqipërisë lidhur me lajmin e publikuar sot ne organin zyrtar të Partisë Demokratike (RD), për publikimin e një prokurimi për ashensorin në ambientet e Kuvendit sqaron; Ashensori do të vendoset në pjesën e godinës së Kryesisë së Kuvendit ku janë të vendosura zyrat e deputeteve. Qëllimi i vendosjes së këtij ashensori është zbatimi i legjislacionit në fuqi për krijimin e të gjitha kushteve të përshtatshme për aksesushmërinë e personave me aftësi të kufizuara të cilët zhvillojnë takime me të zgjedhurit e tyre, apo mund të jenë pjesëmarrës ne mbledhjet e Komisioneve të Kuvendit Prokurimi i shpallur nga Kuvendi për këtë ashensor nuk ka asnjë lidhje me ambientet që janë në funksion të Kryetarit të Kuvendit. Për më tepër Kryetari i Kuvendit ka ende objektiva për të arritur në reduktimin e peshës dhe nuk preferon përdorimin e ashensorit”, thuhet në reagimin e Aleksit.
