Nga Mero Baze
Lulzim Basha nuk është se nuk po lodhet. I ka marrë gjithë qytetet me radhë dhe po u kërkon të vijnë në Tiranë më 16 shkurt. Po u premton rrëzimin e qeverisë, ose detyrimin e saj për të krijuar një qeveri tranzitore për zgjedhjet lokale. Biles në këtë pikë ka bërë xheloz dhe Koço Kokëdhimën.
Por ajo që është problem në gjithë periudhën parapërgatitore të opozitës për protestën, është ajo që do të ndodhë një ditë pas protestës.
Gjithë pasiguritë e opozitës burojnë pikërishtë tek dita pas protestës.
Dhe pikërisht për këtë, Lulzim Basha dhe LSI po japin mesazhe të kundërta.
Arma më e fortë që PD po përdor për të mobilizuar militantët, është diskutimi që pas datës 16 shkurt, PD do djegë mandatet dhe nuk do të shkojë në Kuvend.
Këtë e thotë në çdo vend, ua thotë në çdo rreth, bën sikur e diskuton dhe në grup parlamentar, bën sikur ka unitet për këtë çështje, dhe kjo duket në rregull.
Nga ana tjetër, LSI bën të kundërtën. Dhe ajo thotë në çdo vend, në çdo takim, në çdo qytet, që ‘mandatet nuk i djegim, se i kemi marrë me gjak’.
Dhe nuk është se dhe ata gënjejnë, me gjak i kanë marrë.
Pjesa e mbetur e opozitës, partitë e vogla aleate, janë katër individë, që çfarë thotë njëri nuk mendon tjetri, dhe për këtë çështje.
Ndaj i gjithë investimi i PD për të motivuar protestuesit më 16 shkurt shkon dëm, pasi përplaset me mesazhet e kundërta të aleatit të saj kryesor.
Nëse ka një gjë që ka problem opozita, është mungesa e besimit tek Basha dhe premtimi i fortë që do djegë mandatet është diçka konkrete, që duket sikur mund ta besosh.
Por kur dhe këtë e bën të pavlefshme pjesa tjetër e opozitës, atëhere gjithçka shkon dëm, pasi PD nuk mund t’i lërë fushën e opozitës LSI-së, dhe aq më tepër mandatet e saj, pasi i takon t’i marrë partia më e madhe e opozitës.
Dhe kur dy partitë më të mëdha të opozitës nuk bien dot dakord as si do t’i gënjejnë protestuesit deri më 16 shkurt, shumë të vështirë do ta kenë t’i gënjejnë pas 16 shkurtit.
