Tre punonjës të sigurisë së Portit Detar të Durrësit janë asfiksuar paraditen e sotme.
Ngjarja u regjistrua pranë hyrjes nr.4 të portit, kur tre punonjësit nuk janë ndjerë mirë, madje njëri prej tyre ka qenë në gjendje të rëndë. Nga veprimet e para hetimore dyshohet se kjo gjendje e rënduar shëndetësore mund të jetë krijuar si rezultat i ndonjë rrjedhjeje gazi gjatë furnizimit të një karburanti, i cili ndodhet në afërsi të hyrjes nr.4, por nuk përjashtohen edhe efektet e ndonjë lënde kimike.
Policia vendore bëri të ditur se punonjësit që nuk janë ndjerë mirë ndodhen në Spitalin Rajonal Durrës nën kujdes mjekësor, jashtë rrezikut për jetën.
Ndërkaq, në vendngjarje ka shkuar policia si dhe specialistë të repartit zjarrfikës, mjedisit dhe të Forcës së Sigurisë Portuale, të cilët po ushtrojnë kontroll dhe verifikojnë të gjithë territorin përreth me qëllim sqarimin e plotë të rrethanave të ngjarjes.
Informacioni i policisë
Më datë 17.08.2017, rreth orës 10:50, pranë hyrjes Nr.4 të Portit, 3 punonjës të sigurisë nuk janë ndier mirë.
Nga veprimet e para hetimore dyshohet nëse ka patur rrjedhje gazi gjatë furnizimit të një karburanti, i cili ndodhet në afërsi të hyrjes Nr.4.
Punonjësit që nuk janë ndier mirë janë shtetasit me iniciale B.H. 53 vjeç, F.D. 20 vjeç dhe S.H. 37 vjeç, të cilët ndodhen në Spitalin Rajonal Durrës jashtë rrezikut për jetën.
Nga ana e ekspertëve po kontrollohet dhe verifikohet i gjithë territori përreth. Aktualisht në vend ndodhen uniformat blu dhe ekspertë të fushës, të cilët po punojnë për sqarimin e plotë të rrethanave të ngjarjes.
a.ç
