Blendi Klosi, Sekretar i Përgjithshëm i Partisë Socialiste, në fjalën e tij gjatë asamblesë së PS në Fier, prezantoi shtatë shtyllat kryesore të platformës që do të parashtrohen në Kongresin e PS-së.
“Jemi këtu në këtë takim të zgjeruar të Asamblesë për të prezantuar një pjesë të platformës së energjezimit të PS-së, e cila është ndërtuar nga aktor dhe mbështetës të PS-së. PS vjen në këtë përpjekje 3 pas shumë përpjekjesh dhe fitoresh me Edi Ramën. Nga 9 gara të zhvilluara, 8 ne i kemi fituar, por kjo nuk mjafton. Ne në ADN-në tonë udhëhiqemi për të forcuar punën e partisë, për të krijuar energji të reja brenda strukturave tona, për t’iu përshtatur më mirë zhvillimeve dhe për t’i shërbyer qytetarëve në mënyrën më të mirë të mundshme”, tha Klosi.
“Platforma jonë është e ndërtuar në 7 shtylla kryesore. Së pari, qëndron riorganizimi dhe rienergjizimi i strukturës tonë organizative. PS si asnjë parti tjetër në vend, ka një strukturë të mirëorganizuar me shtrirje të gjerë në çdo skaj të vendit. Strukturën tonë klasike organizatën bazë, këshillat zonalë dhe Asamblenë Socialiste të Bashkive, ne nuk duam ta ndryshojë. Por këto vite na kanë treguar se ne duhet punojmë fort me organizatën tonë bazë, pasi kështu përmirësojmë të gjithë strukturën tonë bazë. Kjo për të njohur më mirë shqetësimet e komunitetit dhe për të përçuar më e mirë e shqetësimet dhe problemet e komunitetit tek strukturat tonë të larta”, theksoi ai.
“Tashmë kemi dhe një platformë digjitale që mundëson monitorimin e gjithë hierarkisë së partisë, për të pasur më pas një analizë në asamble dhe në kongres ku ata që nuk zbatojnë këto detyra të mos jenë pjesë e kësaj strukture”, u shpreh Klosi.
Klosi tha se përmes prurjeve të reja, me të rinj ne synojmë të përmirësojmë organizatën bazë të partisë dhe për këtë në shtyllën e dytë për anëtarësimet e reja kemi menduar tre mundësi të reja anëtarësimesh. Së pari duhet t’i kthehemi anëtarësimeve të reja në familjen socialiste.
“Në filozofinë tonë funksionojnë anëtarësimet e reja, por nuk mjafton kjo duke bërë fushata anëtarësimi. Ne synojmë të kemi 4 anëtarë të rinj në çdo organizatë socialiste, ku të jenë një grua, një i ri dhe dy të tjerët faktor të territorit, ne ia dalim”, vijoi ai.
Klosi deklaroi se forumet e partisë duhet të zhvillojnë takime të përjavëshme apo përmuajshme për të dëgjuar problematikat e qytetarëve, pasi zgjedhjet vijnë shumë shpejt.
Gjithashtu, tha gjatë fjalës së tij Kosi, “nuk mund të organizohemi vetëm në kohë fushate. Duhet të organizohemi një herë, dy herë në javë apo muaj, duhet të kemi takime të shpeshta për ndarë problematikat dhe për të dëgjuar qytetarët. Nuk mund të organizohemi vetëm për zgjedhje, zgjedhjet vijnë shumë shpejt”.
Sipas tij, duhet një organizim në vazhdim dhe duhet që të gjithë të jenë gati për të qenë në një zë. “Duhet të jenë gati të gjithë, specialistë të rrjeteve sociale, specialistë të komunikimit, specialistë të gjitha fushave”, tha Klosi. “Kryeministri do të prezantojë vizionin Shqipëria 2030″, vijoi Klosi.
