Asambleja e Përgjithshme e 32-të e Komitetit Olimpik Kombëtar Shqiptar u mblodh në Tiranë, duke sjellë në një tryezë të vetme drejtues të institucioneve, federatave sportive dhe personalitete të sportit.
Ky takim u shënua si një moment i rëndësishëm për të bërë bilancin e vitit të kaluar dhe për të përcaktuar drejtimet strategjike të lëvizjes olimpike në vend.
Në këtë aktivitet morën pjesë ministri i Turizmit, Kulturës dhe Sportit, Blendi Gonxhja, si dhe presidenti i KOKSH-it, Fidel Ylli.
Ministri Gonxhja, në fjalën e tij, theksoi mbështetjen e qeverisë për sportin gjatë vitit 2026, duke bërë të ditur se janë akorduar rreth 185.5 milionë lekë për 18 federata olimpike dhe 45.2 milionë lekë për 16 federata jo-olimpike.
Ai shtoi se janë financuar projekte strategjike dhe nisma për zhvillimin e sportit gjithëpërfshirës.
“Paralelisht, programi ‘Ekipet Sportive në Shkolla’ është zgjeruar duke përfshirë rreth 11,000 nxënës në 293 shkolla, me 826 ekipe dhe 430 trajnerë”, u shpreh Gonxhja, duke nënvizuar se investimet në infrastrukturë dhe organizimi i eventeve ndërkombëtare po krijojnë bazat për rezultate afatgjata të sportit shqiptar.
Nga ana e tij, Presidenti i KOKSH-it, Fidel Ylli, paraqiti një analizë të plotë të punës së vitit 2025, duke evidentuar arritjet e sportistëve shqiptarë në arenën ndërkombëtare, rritjen e rolit të Shqipërisë në diplomacinë sportive dhe përkushtimin për zgjerimin e bazës së sportit në vend. Ai vlerësoi rolin e federatave dhe drejtuesve të tyre, duke theksuar se rezultatet janë fryt i bashkëpunimit, profesionalizmit dhe përkushtimit të përbashkët.
Në kuadër të asamblesë, u ndanë edhe Urdhrat Olimpikë për gjashtë figura të shquara të sportit shqiptar: Nikolin Dionisi, Hektor Shaqiri, Gëzim Zeneli, Sabri Bejleri, Liljana Bejleri dhe Hysen Omi. Ky vlerësim u bë në shenjë mirënjohjeje për kontributin e tyre të jashtëzakonshëm ndër vite si sportistë, trajnerë dhe drejtues.
Asambleja e Përgjithshme e 32-të e KOKSH-it u shënua si një moment i rëndësishëm për konsolidimin e vizionit të sportit shqiptar, duke vendosur në qendër mbështetjen institucionale, zhvillimin e talenteve të rinj dhe nderimin e figurave që kanë lënë gjurmë në historinë e sportit kombëtar.
