Situata nga zjarri në Parkun Kombëtar të Lurës vijon të jetë kritike prej më shumë se një jave. Terreni i thyer dhe era e fortë kanë vështirësuar ndjeshëm përpjekjet e forcave të angazhuara për të izoluar vatrën e zjarrit, e cila mbetet ende aktive.
Flakët kanë përfshirë një zonë të thepisur të mbuluar me bimësi të rrallë, duke përfshirë drurë ahu, pisha dhe barishte. Për të përballuar situatën, këtë të shtunë është vënë në dispozicion një helikopter i Ministrisë së Mbrojtjes, i cili ka ndërhyrë nga ajri për të shuar zjarrin në zonat ku ndërhyrja tokësore është pothuajse e pamundur. Kjo ndërhyrje nga ajri synon të ndihmojë forcat në terren që të fitojnë kohë dhe kontroll mbi përhapjen e flakëve.
Sipas informacioneve të fundit nga terreni, aktualisht janë dy vatra aktive që vazhdojnë të përhapen të ndihmuara nga era. Pavarësisht përpjekjeve të pandërprera, zjarri po përparon në mënyrë të rrezikshme, duke kërcënuar një sipërfaqe gjithnjë në rritje të parkut.
Në operacion janë angazhuar forca të Mbrojtjes nga Zjarri dhe Shpëtimit (MZSH), të Administratës së Zonave të Mbrojtura (ADZM), punonjës të njësisë administrative Lurë, forca vullnetare si dhe efektivë të Forcave të Armatosura. Përpjekjet janë përqendruar në izolimin e vatrave dhe parandalimin e përhapjes më të gjerë të zjarrit.
Ende nuk ka një përllogaritje të saktë të dëmit të shkaktuar, por sipas vlerësimeve paraprake janë djegur disa hektarë sipërfaqe pyjore dhe tokë me bimësi. Autoritetet janë të shqetësuara për ndikimin afatgjatë në mjedisin e parkut, i cili është një pasuri natyrore me rëndësi kombëtare.
Puna për shuarjen e zjarrit po vijon me intensitet të lartë, por kushtet e vështira klimatike dhe gjeografike po e bëjnë të pamundur vendosjen e kontrollit të plotë. Autoritetet u bëjnë thirrje banorëve të zonës të shmangin lëvizjet pranë zonës së prekur dhe të bashkëpunojnë me forcat e angazhuara në operacionin e shuarjes së flakëve.
