Ish-kryetari socialist i Bashkisë së Pogradecit Artan Shkëmbi thotë se humbja në zgjedhjet e 21 qershorit nga mazhoranca nuk ishte surprizë. Dhe kjo sipas tij vjen për shkak se kandidatja e së majtës ishte e dobët. Jo vetëm kaq, por sipas Shkëmbit edhe organizimi i fushatës linte për të dëshiruar.
“Nuk mendoj që rezultatet e Pogradecit kanë qenë surprizë as kur unë fitoja 3 mandate dhe as kur e majta humb. Ne kemi pasur 2 kryetarë të djathtë dhe 3 të majtë. Kemi deputetë e majtë e të djathtë. Pogradeci nuk është bastion as i së majtës dhe as i së djathtës, është bastion i qytetarëve. Nuk kam qenë i përfshirë në fushatë. Di ta lexoj rezultatin. Kandidatura e së majtës në Pogradec ishte e gabuar dhe organizimi i fushatës i keq. Në zgjedhjet e kaluara organizimi ka qenë shumë i mirë. Unë kam arritur të fitoj herën e parë me 700 vota diferencë dhe më pas ta 3-fishoj diferencën. Ka një rënie të menjëhershme pas këtyre zgjedhjeve. Mendoj që ka qenë një organizimi i dobët i fushatës. Nuk është arritur tek problematika që shqetëson qytetarët por u është premtuar gjëra që nuk janë të interesuar”, deklaroi Shkëmbi për News 24.
