“Më kanë kërcënuar për punë pronash”. Kështu deklaroi drejtori i Përgjithshëm i Kadastrës Artan Lame në emisionin “Wake Up”.
“Kërcënime për punë emërimesh nuk kam marrë, për punë pronash po sepse ka një gjë nuk e bën dot pa specialistë. Duhet të jesh profesionist, ndërsa të jesh punonjës te Hipoteka duhet të jesh o jurist me bagazh, o topograf, prandaj kam bërë thirrje që më lini o të bëj këtë o të bëj atë”, tha Lame.
Ai nuk preferoi të tregojë një rast konkret, por theksoi se i ka denoncuar këto raste dhe ka marrë mbështetjen e qeverisë.
“Nuk mund të them raste. Është normale ka pasur disa raste, që nga rastet serioze dhe unë i kam referuar, deri te rastet e njerëzve që të stërlodhin por kur ikin qetësohem. I mirëkuptoj në fakt se janë të dërmuar duke pritur me vite dhe kur i thua duhet të shkosh në gjykatë sikur i ke vrarë. Por sinqerisht më duhet të falënderoj qeverinë sepse më ka dhënë shumë mbështetje”, deklaroi më tej drejtori i Kadastrës.
Artan Lame tha se kanë mbetur shumë objekte pa u legalizuar për shkak të vështirësive.
