Arsyet përse qajnë foshnjet
Klithmat, britmat, të qarat janë me të vërtetë situata shumë shqetësuese të prindërve ndaj foshnjeve. Kur ata mësojnë të flasin është të paktën pjesërisht më e lehtë për të kuptuar se çfarë i shqetëson. Megjithatë edhe kur fëmijët janë në fillimet e tyre të komunikimit situata vazhdon të jetë kritike, pasi prindërit duhet të jenë shumë të kujdesshëm ndaj çdo mënyre komunikimi që mund t’i japë fëmija.
Për prindërit e rinj shpesh kjo gjendje shndërrohet në stres, por në të vërtetë duhet t’i marrin gjërat më shtruar, sepse të tilla situata janë normale tek çdo foshnje deri në momentin që arrin të kuptosh “sinjalet” e tij.
Është shumë e rëndësishme që të krijohet një lidhje unike mes nënës dhe fëmijës, duke zbuluar ditë pas dite se çfarë mund ta bëjë fëmijën të qajë apo të ketë shqetësime të formave të ndryshme.
Nëna duhet të arrijë të kuptojë se kur fëmija qan se është i zemëruar apo kur kërkon të thotë se është i uritur. Pra duhet që një nënë të mësojë gjuhën e trupit të fëmijës së saj. Për shembull sinjalet e të qarit para vaktit të drekës mund të tregojnë uri dhe kur një fëmijë qan afër me kohën e gjumit mund të thotë se ai është i lodhur dhe kërkon të flejë.
Reagimet ndaj këtyre situatave të veçanta mund të jenë të dhëna të dobishme në lidhje me të qarat apo britmat e një fëmije.
Në përgjithësi arsyet më të zakonshme të të qarit të fëmijëve janë: gjumi, gjendja e lodhur, uria, gjendje frike, dhimbje barku apo ndonjë reaksion alergjik ndaj ushqimit.
Në të tilla situata nëse fëmija nuk pushon së qari është mirë që të drejtoheni menjëherë tek mjeku pediatër. Nuk duhet në mënyrë kategorike që ta “shkundni” fëmijën për ta ndalur së qari, pasi tronditja është rrezik fatal për bebin.
