Presidenti i Republikës, Bujar Nishani zhvilloi sot një takim pune me Ministren e Arsimit Lindita Nikolla, e cila shoqërohej edhe nga Zëvendësministri Arbjan Mazniku, ku u diskutua Ligji për Arsimin e Lartë.
Kreu i Shtetit shqiptar vlerësoi si shumë pozitiv vullnetin dhe angazhimin e qeverisë në ndërmarrjen e reformës në Arsimin e Lartë duke u shprehur se: “Reformat duhen bërë sipas kritereve dhe parimeve ligjore të sanksionuara në Kushtetutë si dhe duke ndjekur modelet më të mira ekzistuese.”
Presidenti Nishani dhe Ministrja Nikolla së bashku me Zëvendësministrin Mazniku diskutuan gjerësisht për Ligjin e ri të Arsimit të Lartë duke e konsideruar atë si shumë të rëndësishëm për edukimin sa më cilësor të brezave të rinj dhe me një ndikim të madh në të ardhmen e vendit.
Presidenti Nishani dhe pjesëmarrësit në takim shkëmbyen gjithashtu mendime dhe pikëpamje lidhur me vlefshmërinë ligjore dhe kushtetuese të këtij ligji, me të mirën publike dhe mbrojtjen e përfaqësimin sa më të mirë e gjithëpërfshirës të interesave të studentëve, profesorëve dhe pedagogëve shqiptarë.
Nga ana e saj Ministrja e Arsimit dhe Sportit, Lindita Nikolla e vlerësoi ‘të shëndetshëm dhe konstruktiv’ takimin me Presidentin Bujar Nishani paraditen e sotme në Presidencë, ku ne fokus ishte ligji ‘per arsimin e larte’ .
“Siguruam Presidentin se ligji sjell përmirësime për studentët dhe pedagogët. Po ashtu, në përputhje me Kushtetutën ai i garanton çdo studenti që të ndjekë institucionet e arsimit të lartë sipas meritës”, tha Nikolla pas takimit, që zgjati rreth dy orë.
Ajo pohoi se takimi me Kreun e shtetit u karakterizua ‘nga debati i qetë, konstruktiv dhe i shëndetshëm, si pjesë e besimit të një institucioni të rëndësishëm, siç është ai Presidentit të Republikës”.
Ligji “Për arsimin e lartë”, Nishani takon ministren Nikolla
Presidenti i Republikës, Bujar Nishani, ka pritur paraditen e sotme në Presidencë ministren e Arsimit dhe Sportit, Lindita Nikolla. Në fokus të takimit mes Kreut të shtetit dhe ministres ishte reforma në arsimin e lartë, e kontestuar nga opozita dhe qarqet universitare.
Takimi u zhvillua me dyer të mbyllura dhe i parapriu pak ditë më parë një tjetër takim konsultues mes presidentit Nishani dhe një përfaqësie akademikesh dhe profesoresh, të cilët parashtruan qëndrimet e tyre rreth ligjit “Për arsimin e larte”, i miratuar më 20 korrik në parlament në një seancë të posaçme. Vetë ministrja tha pas takimit, se kishte pasur një shkëmbim pikëpamjesh “të shëndetshme” me Presidentin.
