Skuadra e Arsenalit është hedhur në sulm për qendërmbrojtësin e Valencias, shqiptarin Shkodran Mustafi. Gazeta britanike “Daily Star” të martën ka raportuar se Arsenali ka nisur negociatat me agjentin e Mustafit, shkruan Koha Ditore.
Lojtari po kërkohet me ngulm nga trajneri i Arsenalit, Arsene Wenger, që do të jetë pa mbrojtës të mjaftueshëm në fillim të edicionit 2016/17, që nis muajin tjetër.
Në fakt Arsenali është në krizë për një mbrojtës qendre, pasi Per Mertesacker pritet të mungojë të paktën pesë muaj për shkak të lëndimit të gjurit. Edhe Laurent Koscielny nuk do të jetë në dispozicion të Ëengerit për fillimin e edicionit për shkak të dëmtimit që e ka pësuar gjatë ndeshjeve me Përfaqësuesen e Francës në “Euro 2016”.
“Arsenali ka një javë që ka nisur negociatat me agjentin e Shkodran Mustafit. Mbrojtësi i Valencias shihet si zgjidhje ideale për situatën tek Arsenali ku Mertesacker dhe Koscielny pritet të mungojnë për një kohë të gjatë në edicionin e ri”, ka shkruar gazeta. (b.an)
