Moti i nxehtë që ka goditur pjesën jugore të Pakistanit ka shkaktuar më shumë se 1 000 të vdekur, pjesa më e madhe punonjës të varfër, lypës dhe të moshuar.
Temperaturat kanë arritur deri në 45 gradë Celsius fundjavën e kaluar në Karaki, kryeqyteti financiar dhe qyteti më i madh i vendit me rreth 20 milionë banorë duke goditur më të varfërit, punonjës dhe persona të moshuar.
Të paktën 1 079 të vdekur janë regjistruar në këto pesë ditë në spitalet kryesore të qytetit (929 në spitalet publike dhe 150 në spitalet private) sipas një numërimi të kryer sot në mesditë nga një gazetar.
“Bilanci është tashmë më shumë se 1 000 të vdekur dhe mund të arrijë në 1 500 pasi disa persona kanë humbur jetën në banesat e tyre apo në klinikat private”, theksoi Anwar Kazmi, një zëdhënës i Fondation Edhi, shoqata më e madhe e bamirësisë në vend.
