Shtetet e Bashkuara arritën marrëveshje të veçanta me Ukrainën dhe Rusinë për të ndalur sulmet në Detin e Zi dhe kundër objektivave të energjisë. Nga ana e tij Uashingtoni është zotuar të heqë disa sanksione kundër Moskës.
Ndërsa nuk ishte e qartë se kur ose si do të fillonin marrëveshjet e sigurisë detare të Detit të Zi, marrëveshjet janë angazhimet e para zyrtare nga dy palët ndërluftuese që nga inaugurimi i Presidentit Donald Trump. Marrëveshja e SHBA-së me Rusinë shkon më tej se marrëveshja me Ukrainën, me Uashingtonin që angazhohet të ndihmojë në kërkimin e heqjes së sanksioneve ndërkombëtare ndaj bujqësisë ruse dhe eksporteve të plehrave, një kërkesë prej kohësh ruse.
Menjëherë pas njoftimeve të SHBA-së, Kremlini tha se marrëveshjet e Detit të Zi nuk do të hynin në fuqi nëse nuk rivendoseshin lidhjet midis disa bankave ruse dhe sistemit financiar ndërkombëtar. Ndërkohë Presidenti ukrainas Volodymyr Zelenskiy tha se kuptimi i tij ishte se marrëveshjet e armëpushimit nuk kërkonin lehtësimin e sanksioneve për të hyrë në fuqi dhe do të hynin në fuqi menjëherë, duke e quajtur deklaratën e Kremlinit një përpjekje për të “manipuluar” marrëveshjet. Zelenskiy tha se nëse Rusia i shkel ato, ai do t’i kërkojë Trumpit të vendosë sanksione shtesë ndaj Moskës dhe të sigurojë më shumë armë për Ukrainën. “Ne nuk kemi besim te rusët, por do të jemi konstruktiv,” tha ai.
Ndërkohë Trump, në një intervistë për Newsmax, pranoi se Rusia mund të përpiqet të vonojë përfundimin e luftës.
“Unë mendoj se Rusia dëshiron të shohë një fund të saj, por mund të jetë se ata po zvarriten. Unë e kam bërë këtë gjatë viteve,” tha ai.
Sakaq, disa orë pas njoftimeve, Rusia dhe Ukraina akuzuan njëra-tjetrën për sulme me dronë, por nuk pati raportime për goditje në Detin e Zi apo objektiva energjetike.
