Vëllai i deputetit të PS, Saimir Hasalla është shoqëruar nga policia e Elbasanit ditën e sotme (21 Korrik).
Raportohet se Denis Hasallës, i cili mban postin e Drejtorit të Kabinetit në Bashkinë Peqin iu janë gjetur në banesën 30 fishekë dhe u vendos në prangat e policisë.
“Strukturat për Hetimin e Krimeve të Drejtorisë Vendore të Policisë Elbasan ekzekutuan vendimin e Gjykatës së Shkallës së Parë të Juridiksionit të Përgjithshëm Elbasan, për lejimin e kontrollit në disa banesa, në kuadër të një procedimi penal të vitit 2024.
Në vijim të veprimeve u bë arrestimi i: D. H., 35 vjeç, pasi gjatë kontrollit në banesën e tij u gjet një sasi municioni luftarak”, njoftoi policia.
Municioni luftarak u zbulua në shtëpinë e vëllait të deputetit socialist gjatë kontrolleve në kuadër të hetimeve për çështjen e inceneratorit të Elbasanit.
