Një nga njerëzit më të kërkuar të Italisë, i dyshuar se kishte blerë dy piktura të vjedhura të Van Gogh në tregun e zi, është arrestuar në Dubai.
Raffaele Imperiale, “Mbreti i Drogës” dhe kreu i klanit kriminal Camorra, në Napoli është vënë në pranga në 4 gusht, ndërkohë që lajmi për arrestimin e tij u bë i ditur sot.
Imperiale, 46 vjeç, po mbahet në Emiratet e Bashkuara Arabe ndërsa ministria italiane e drejtësisë përfundon procedurat e ekstradimit.
Që nga janari 2016, Imperiale është kërkuar nga Italia për trafik ndërkombëtar. Ai u konsiderua si një nga të arratisurit më të rrezikshëm dhe më të kërkuar në Itali.
Imperiale ishte gjithashtu në kërkim për pastrim parash, tha policia.
Policia vuri në dukje se Imperiale në fillim të këtij viti dha një intervistë për të përditshmen Napoli Il Mattino, në të cilën ai mohoi çdo lidhje me vjedhjen e pikturave dhe pretendoi se i kishte blerë veprat sepse ai ishte një “dashnor pasionant i artit”.
Imperiale, pjesë e klanit Amato-Pagana, u largua nga Italia për në Amsterdam në vitet 1990 për të menaxhuar një kafene dhe filloi të bënte aleancë me trafikantët holandezë.
Pasi fillimisht shiti tableta ekstazie, ai u fut në tregun e kokainës, duke trafikuar mijëra tonë drogë në Holandë me ndihmën e trafikantëve të Amerikës së Jugut, ndërsa në të njëjtën kohë operonte në restorante dhe kompani investimesh./ The Guardian
/m.j
