Benjamin Mendy, lojtari i Manchester City, është akuzuar zyrtarisht nga Policia e Cheshire. Ndaj futbollistit francez rëndojnë katër akuza për përdhunim dhe një abuzim tjetër seksual, që dyshohet se është kryer kundër tri femrave mbi moshën 16 vjeç, midis tetorit 2020 dhe gushtit 2021.
Lajmi, i cili doli në media të enjten pasdite, ishte i njohur më parë nga Manchester City, i cili tashmë ka publikuar një deklaratë që njofton pezullimin e lojtarit derisa të përfundojë hetimi. Gjyqi kundër tij do të fillojë sot në gjykatën e Chester.
Mendy, mbrojtësi i majtë i skuadrës së Pep Guardiolës, ka nënshkruar me “qytetarët” e Premier League nga Monaco me një vlerë prej 57.5 milionë euro. Ai kishte kapur formacionin titullar të sezonit të ri, por gjatë këtyre ndeshjeve të para, veçanërisht në duelin kundër Tottenham, u pa në situata të çrregullta taktike dhe me mungesë përqendrimi.
“Shërbimi i Prokurorisë së Crown (CPS) ka autorizuar policinë e Cheshire të akuzojë një burrë në lidhje me akuza të ndryshme të abuzimit seksual. Benjamin Mendy, 27 vjeç, është akuzuar për katër akuza për përdhunim dhe një për abuzim seksual.
Akuzat iu referohen tri ankesave të paraqitura nga persona mbi moshën 16 vjeç për ngjarjet që ndodhën midis tetorit 2020 dhe gushtit 2021. Mendy, nga Prestbury, mbetet në paraburgim policor në pritje të paraqitjes së tij në gjykatën e Chester të premten e 27 gushtit”, – thuhet në njoftimin e organit të hetimit.
Klubi i tij, përmes një deklarate të shkurtër ka siguruar se “Manchester City mund të konfirmojë se, si rezultat i akuzave të paraqitura sot nga policia, Benjamin Mendy është pezulluar derisa të përfundojë hetimi. Çështja është juridike dhe, për këtë arsye, ne nuk mund të komentojmë më shumë për të derisa procesi të ketë përfunduar”.
/b.h
