Dymbëdhjetë persona, përfshirë edhe një pjesëtar të Policisë së Kosovës, janë arrestuar të mërkurën nga policia pas dy aksioneve të zhvilluara në disa qytete
Në rajonin e Dukagjinit aksioni është zhvilluar nën dyshimin për fajde, kurse në Mitrovicë është realizuar pas dyshimeve për trafikim me qenie njerëzore. Në të dyja rastet janë sekuestruar disa armë, para të gatshme, si dhe prova të tjera materiale, shkruan “Koha Ditore”.
Katër persona me inicialet: B. K. (1984), N. M. (1972), A. R. (1975), si dhe S. J. (1976) janë arrestuar gjatë operacionit policor në Mitrovicë.
Pas përfundimit të aksionit policia ka njoftuar se hetuesit nga Drejtoria për Hetimin e Trafikimit me Qenie Njerëzore, pas një pune operative hetimore njëvjeçare, bazuar në informatat dhe provat që kishin siguruar më datë 16 gusht të këtij viti, kanë realizuar një operacion policor në Prishtinë, kurse kanë vazhduar më 24 gusht në Mitrovicë (pjesën jugore), i cili ka rezultuar me arrestimin e katër personave të dyshuar dhe identifikimin e një viktime të trafikimit me qenie njerëzore. (b.an)
